Situata e krijuar në Fier me djegien e fushës së mbetjeve ngre shumë pikëpyetje mbi projektin e shumëpërfolur të inceneratorit në këtë qytet.
Kompania që ka marrë koncesionin është paguar plot 28.6 milionë euro nga buxheti i shtetit pa vënë asnjë ditë impiantin në punë.
Pas akuzave të opozitës, por edhe denoncimeve në media se inceneratori i Fierit ishte një vepër fantazmë që thithte para publike, në tetor të vitit të kaluar kompania koncesionare u detyrua të reagojë publikisht.
Në të njëjtën ditë, Edi Rama u shfaq në emisionin Opinion në Klan, ku dha dhe afatin e përfundimit të inceneratorit.
Dhjetori kaloi. Por as landfilli dhe as impianti i djegies nuk u vunë në punë. Megjithatë disa muaj më pas kryeministri u shfaq sërish tek inceneratori i Fierit, në kulmin e fushatës elektorale.
Në prill, Edi Rama mori mandatin e tretë. Por inceneratori dhe landfilli sërish nuk u vunë në punë. Madje u harruan, deri ditën kur në Fier u krye një krim i rëndë mjedisor, djegia e mbeturinave në mes të qytetit.
Sipas të dhënave zyrtare, deri tani janë paguar 28.6 milionë euro nga buxheti i shtetit për kompaninë Integrated Waste Treatment Fier. Praktikisht të gjithë vlerën e kontratës. Madje, pagesa e fundit prej 500 mijë eurosh nga Ministria e Infrastrukturës është bërë në datën 15 korrik. Por mbetjet në Fier digjen në mes të qytetit dhe askush nuk mban përgjegjësi.
As Bashkia, as ministria dhe as prokuroria. Të gjithë këta heshtin. Ndërkohë që komedia e zezë me inceneratorin e Fierit vazhdon.
28.6 milionë euro të paguara për të helmuar një qytet. /MCN TV/
