Kreu i Partisë Demokratike, Lulzim Basha, u paraqit sot së bashku me avokatin e tij në Gjykatën e Posaçme Antikorrupsion për padinë e depozituar ndaj kryebashkiakut Erion Veliaj, të cilin e akuzon për shpifje.
Kjo ishte seanca e parë, seanca e pajtimit, e cila zgjati rreth një orë. Pas seancës Basha nuk pranoi të flasë për mediat, por përfaqësuesi i tij ligjor, Indrit Sefa, tha se ai ka refuzuar që të pajtohet me kryebashkiakun e Tiranës.
“Procesi gjyqësor ka të bëjë me kërkesën e zotit Basha në lidhje me kërkesën penale si viktimë akuzuese ndaj zotit Erion Veliaj në kuadër të kërkesave që kemi ngritur më përpara. U zhvillua seanca e parë, seanca e pajtimit, ku zoti Basha erdhi vetë personalisht dhe deklaroi se nuk ka asnjë vullnet për tu pajtuar me të akuzuarin Erion Veliaj”.
Avokati sqaroi më tej se Veliaj nuk ishte i pranishëm vetë por përfaqësohej nga avokati dhe se edhe ai kishte refuzuar pajtimin.
“U bë seanca gjyqësore, u morën deklarimet e palës që në mënyrë kategorike refuzoi pajtimin”.
Seanca e radhës do të jetë në 24 shtator.
Ping-pongut për kompetencat mes gjykatave lidhur me çështje të tilla i dha zgjidhje Gjykata e Larta, e cila njoftoi GJKKO do të shqyrtojë të gjithë akuzat penale të ngritura ndaj zyrtarëve të lartë.
Lulzim Basha paditi kryetarin e Bashkisë së Tiranës, Erion Veliaj, pasi e akuzonte se ka shpifur ndaj personit të tij.
“Kryetari i PD u bë me 4 shtëpi gjatë tërmetit dhe pandemisë. Kryetari i PD ka përfituar gjatë periudhës së fatkeqësisë. Kryetari i PD ka ndërtuar kate pa leje,”- janë shpifjet që sipas Bashës, Veliaj ka thënë për të.
Kreu i Bashkisë së Tiranës, Erion Veliaj akuzoi kreun e Partisë Demokratike se në këmbim të mbylljes së protestës së Astirit, ka marrë katër vila.
