Eksperti i shëndetit publik, Erion Dasho, u shpreh sot se varianti Delta nuk do të krijojë në 2021 shumë probleme në Shqipëri, kjo për faktin se 2 mln shqiptarë e kanë kaluar Covid-19.
“Nga të dhënat mund të them se rreth 70 % e shqiptarëve kanë krijuar imunitetin natyral, pasi kanë kaluar Covid-19 dhe janë të imunizuar. Çështja është te ai 30 % që nuk ka imunitetin, pra nuk ka kaluar virusin, që mund të konsiderohen si xhepa, ndaj dhe procesi i vaksinimit mbetet arma kryesore dhe e vetme lidhur me situatën e pandemisë”, tha Dasho.
Ai u shpreh se studimet kanë treguar se vaksina Coronavac, që aplikohet masivisht në Shqipëri, nuk ka dhënë rezultate, dhe kjo është parë në disa vende ku kjo vaksinë është aplikuar.
“Është e vërtetë që shumë nga vaksinat nuk mund të parandalojnë variantin Delta, por vaksinat tashmë të çertifikuara si Pfizer apo AstraZeneca, kanë rezultuar efikase dhe me një mbrojtje shumë të lartë. Ndaj dhe autoritetet shqiptare duhet të mendojnë që në vjeshtë të aplikojnë këto vaksina”, tha Dasho.
Ai tha se çdo person që hyn në Shqipëri duhet të paraqesi një pasaportë shëndetësore, pasi kjo ndikon në uljen e importimit të rasteve të reja, sikundër duhet që të izolohen rastet e reja, të ndiqet zinxhiri i transmetimit, në mënyrë që të shmanget infektimi i personave të paimunizuar.
