Edhe ditën e djeshme Partizani kreu se ancën stërvitore në stadiumin e Kamzës, si gjithmonë me seancën që startoi në orën 18:30. Edhe kjo seancë stërvitore kishte në fokus taktikën dhe Daja befasoi me disa nga lëvizjet e tij.
NISJA-Lojtarët zbritën më herët në fushën e blertë, rreth orës 18:00, ndërsa në orën 18:30 edhe Daja e stafi i tij teknik iu bashkua fushës së blertë. Pas pak minutash bisedim, ekipi nisi fazën e nxemjes. Pas ushtrimeve të streçingut, gjithçka ishte gati për të vënë në zbatim taktikat dhe detyrat e trajnerit. Ajo që ra në sy ishte se tre futbollistët afrikanë të afruar në provë u stërvitën të veçuar, duke mos qenë pjesë e përgatitjeve të pjesës tjetër të ekipit.
TAKTIKA-Rreth orës 19:00 Daja ndau ekipin në dy grupe: formacioni titullar dhe rezervat. Pas rreshtimeve të lojtarëve u panë disa surpriza. Daja ka menduar të ndryshojë sistem për sfidën e dytë kundër Bazelit. Damçevski pritet të rreshtohet si mbrojtës i majtë, në vend të të dëmtuarit Musta, i cili edhe ditën e djeshme u stërvit individualisht, duke bërë disa vrapime rreth fushës. Në mesfushë, para mbrojtjes, u rreshtua Jurgen Bardhi. Diçka e çuditshme, duke pasur parasysh se 23-vjeçari është një fantazist. Ndërsa në të djathtë të tij ishte i riu Arinaldo Rrapaj. Ndërsa në të majtë, Herald Marku. Lukas Kardozo ka kaluar tek ekipi i rezervave, ndërsa në vend të tij, si sulmues i majtë, u pa Valentino Murataj.
BEFASIA-Rreshtimi i Muratajt si sulmues i majtë ishte një vendim i befasishëm nga Daja, pasi 24-vjeçari është një mesfushor tipik qendror. Megjithatë, trajneri i të kuqve e ka një strategji në mendje që ka sjellë këtë zhvendosje. Futja e Muratajt nga qendra i jep mundësi Markut që të dalë pas shpine në të majtë, duke pasur parasysh se edhe Damçevski nuk është një mbrojtës që shtyn shumë përpara. Edhe në skemat e aplikuara në stërvitje, objektivi i lojtarëve të Partizanit ishte të nxirrnin Herald Markun të lirë në të majtë, në mënyrë që mëngjarashi të krosojë për dyshen Zhunior-Cara.
LUKAS-Kardozo duket se e ka humbur vendin e tij në formacionin titullar, ndoshta ndikuar dhe nga rastet e shumta që humbi në sfidën kundër Bazelit. Megjithatë, braziliani u pa shumë agresiv në stërvitje, duke luftuar fort për çdo top dhe duke u përplasur vazhdimisht me Gligorovin, që e kishte rival direkt.
PËRPLASJET-Gjatë gjithë kohës kur viheshin në zbatim skemat, por dhe në ndeshjen e kontrollit që u zhvillua për disa minuta, përplasjet ishin të ashpra mes lojtarëve. Kardozo-Gligorov ishte një përplasje e vazhdueshme, por edhe Sota me Zhuniorin nuk i kursyen ndërhyrjet. Madje në një moment sulmuesi brazilian bën një sparkatë të rrezikshme në një prej dueleve të tij. Kote dhe Bardhi shpeshherë u përplasën me njëri-tjetrin, madje nuk munguan as shkëmbimet e fjalëve mes futbollistëve. Daja ndërkohë qëndronte i qetë në mesin e fushës, duke mos e ndaluar për asnjë moment lojën dhe duke iu kërkuar lojtarëve të tij të vazhdonin të luftonin.
ACARIMI- Murataj, si sulmues i majtë, e kishte disi të vështirë të përshtatej dhe të ekzekutonte rolin ashtu siç Daja kërkonte, çka solli dhe frustrimin e trajnerit kryeqytetas në disa raste. Ndërsa në 15 minutat e fundit të stërvitjes Daja provoi disa skema nga goditjet e këndit, të cilat i ekzekutoi Herald Marku. Në rreth 10 tentativa, mesfushori nuk ekzekutoi asnjëherë siç duhet, çka solli edhe një mërzitje te trajneri Daja. Në orën 20:14 trajneri kryeqytetas mbylli stërvitjen dhe largohet menjëherë drejt dhomave të zhveshjes, me lojtarët që u larguan më pas një e nga një për t’iu drejtuar dusheve. Njëjtë si në seancën stërvitore të së dielës, edhe seanca e djeshme zgjati për rreth 2 orë.
/Panoramasport
