Kreu demokrat, Lulzim Basha, iu shmang një pyetjeje të drejtpërdrejtë nëse ish-Kryeministri Sali Berisha duhej të ishte pjesë e Parlamentit të ri, pas shpalljes non grata nga Departamenti amerikan të Shtetit.
Basha u pyet nëse në rastin e z. Berisha duhej të përdoreshin të njëjtat standarde, që u kërkuan nga PD, si në rastin e Tom Doshit, ndërsa tha se “PD i qëndron absolutisht zbatimit të ligjit të dekriminalizimit”.
Basha tha se ky ligj u miratua në 2014 dhe pavarësisht se nuk kishte votat në Kuvend, detyroi mazhorancën e drejtuar nga Edi Rama të miratonte një ligj të tillë.
“Sot vëmendja duhet të jetë te raporti final i OSBE/ODIHR, për çështje të tjera do të përgjigjem në konferencat e ardhshme”, u shpreh Basha, lidhur me pyetjen që iu drejtua, nëse z. Berisha duhej të ishte ose jo pjesë e Parlamentit të ri.
