Trembëdhjetë anëtarë të PD Korçë, mes të cilëve edhe sekretari Devis Osmani dhe anëtari i Këshillit Kombëtar Andrea Mano, kanë dhënë dorëheqjen nga funksionet në Partinë Demokratike.
Në një letër publike, ata bëjnë me dije edhe motivacionin e dorëheqjes së tyre. Drejtuesit e PD-së në degën e Korçës akuzojnë kryetarin e PD, Lulzim Basha se po drejton partinë në mënyrë arrogante, duke ua bërë të pamundur kryerjen e funksioneve të tyre. Gjithashtu, ata deklarojnë se Basha po frenon PD që të përballet me keq-qeverisjen e Ramës, duke e kthyer PD në parti klienteliste dhe në shërbim vetëm të interesave personale.
“Gjykojmë se kryetari i PD me arrogancën e tij po e kthen PD në një parti klienteliste dhe në funksion vetëm të interesave personale. Me veprimet apo mosveprimet e tij, ka hedhur poshtë të gjithë punën tonë të ngritur me mund dhe sakrifica gjatë 8 viteve opozitë. Gjithashtu me këtë mënyrë drejtimi, mendojmë se PD po mbahet qëllimisht e frenuar prej tij, për të luftuar keq-qeverisjen e Edi Ramës”, thuhet në letër.
“Të ndodhur në këto kushte, e gjejmë të pamundur ushtrimin e funksioneve tona dhe të shohim me optimizëm drejt të ardhmes së kësaj partie. Theksojmë se jemi dhe mbetemi anëtarë të PD dhe mbështetës të ideve dhe vlerave që ajo mbart që nga dita e krijimit të saj”, shkruhet më tej në letër.
