Autoritetet shëndetësore në Shqipëri kanë konfirmuar qarkullimin e variantit Delta në Shqipëri, i cili duket se ka ndikuar në rritjen e rasteve ditore me Covid-19.
Referuar të dhënave zyrtare, virusi është sjellë në Shqipëri nga turistët ose emigrantët që jetojnë në vende të ndryshme, të cilët kalojnë në pikat e kalimit kufitar shqiptar pa iu nënshtruar testeve, pa paraqitur asnjë dokument nëse janë ose jo të vaksinuar, apo e kanë kaluar ose jo Covid-19.
Dhe duket se e gjithë kjo ndodh pasi autoritetet mendojnë se Covid nuk mund të ndalohet në kufi, edhe pse shumica e vendeve europiane, por edhe më gjerë, minimalisht i kërkojnë shtetasve shqiptarë një test të realizuar 48 orë para udhëtimit.
Kështu bazuar në të dhënat zyrtare, dy raste me Delta janë importuar nga Mbretëria e Bashkuar, 2 nga Gjermania, 1 Cekia, Spanja, Maqedonia e Veriut, 1 rast nga Pakistani.
Bazuar në të dhënat zyrtare 38% të rasteve kemi nga ky grupim, 62% të rasteve nuk kanë lidhje me udhëtimet jashtë vendit.
Sipas Komitetit Teknik të Ekspertëve, qytetet ku janë konstatuar te infektuar me variantin DELTA janë Tirana, Elbasani, Shkodra, Lezha, Kavaja, Gjirokastra, Peqini, Korça, Mati dhe Vlora.
“Në Charite u dërguan 21 mostra klinike, nazale dhe faringiale, të cilat kanë rezultuar pozitive. Këto janë mostra që janë vënë mënjanë për periudhën 1 qershor deri në 12 korrik, kur kemi filluar të shikojmë edhe sinjalet e pazakonta. Këto mostra ne i kemi gjetur në një përhapje në qytete si Tirana, Elbasani, Shkodra, Lezha, Kavaja, Gjirokastra, Korça, Peqini, Mati dhe Vlora, me numra të vegjël natyrisht”, ka bërë me dije drejtoresha e IShP, Albana Fico.
“Situata epidemiologjike në vend ka shënuar disa rritje në raport me incidencën, e cila tashmë është 10 për 100 mijë banorë. Mesatarja ditore është rritur nga 13 deri në 27. Numri total i rasteve aktive rezulton i rritur nga 272 në 280. Numri i bashkive të cilat janë përfshirë nga rastet e reja ka shkuar në 10. Fatmirësisht nuk kemi pasur raste fatalitetesh për javën e 30. Vijojnë të shtohen numrat”, tha Fico.
