Petro Koçi, i cili mori mandatin e deputetit në zgjedhjet e 25 prillit, si kandidat i PS-së në listën e Fierit, do të paraqitet sot në orën 11:00 në SPAK, ku pritet të japë më shumë shpjegime lidhur me denoncimin e tij në rrjetet sociale, se grupet kriminale po marrin tenderat në Bashkinë e Fierit.
SPAK ka nisur verifikimin pas denoncimeve të bëra në rrjetet sociale nga ish-zëvendësministri i Mbrojtjes.
Me anë të një postimi, Koçi shprehej se në Fier duart e krimit janë shtrirë mbi financat publike.
Deputeti socialist akuzoi se tenderat publikë në Fier po fitoheshin nga organizata kriminale që operojnë në këtë zonë.
Sipas tij, këto organizata janë fuqizuar duke pastruar paratë e pista në industrinë e ndërtimit dhe vazhdojnë të përvetësojnë fitime kolosale nga taksat tona.
“Organet ligjzbatuese nuk duhet të lejojnë që qyteti ynë ti nënshtrohet botës së krimit të organizuar. Partia Socialiste nuk bën asnjë hap pas në luftën ndaj së keqes”, denonconte Koçi.
Kreu i SPAK, Arben Kraja, kur është pyetur lidhur me denoncimin publik të deputetit tha se kanë nisur verifikimet për të parë nëse qëndrojnë apo jo akuzat publike të deputetit të zgjedhur socialist.
Pas denoncimit të Koçit pati një seri reagimesh nga ish-drejtues dhe drejtues të institucioneve lokale në Fier, pjesë e strukturave të PS-së, ndërsa akuzat e deputetit u interpretuan sikur i drejtoheshin kryebashkiakut Armando Subashi. Gjithsesi Koçi në një reagim të mëvonshëm tha se nuk ka përmendur emra, ndërsa hetuesit e SPAK, sipas raportimeve mediatike, zbarkuan në Bashkinë e Fierit, ku edhe kanë sekuestruar disa dosje.
