Mjeku i njohur infeksionist, Tritan Kalo, i ka kushtuar edhe një herë tjetër rëndësi apelit ndaj qytetarëve për kujdes të shtuar gjatë sezonit të plazhit, pasi simptomat e variantit shumë ngjitës të Covid-19, atij që njihet si ‘Delta’, janë të njëjta dhe mund të ngatërrohen me simptomat e “gripit të verës”.
“Rikujtesë për pushuesit në brigjet e Adriatikut, të Jonit dhe jo vetëm……”Gripi i verës” apo ethat 3-5 ditore është një virozë, e cila ka shënja klinike pothuajse plotësisht të njëjta me shfaqjet klinike të variantit “Delta”, të infeksionit të shkaktuar prej virusit Sars-Cov2/Covid-19, me: temperaturë, dhimbje koke, dhimbje muskujsh e kyçesh, këputshmëri e shpesh dhimbje barku të bashkëshoqëruara me të përziera ose/dhe të vjella e heqje barku/diarrhe, POR pa çrregullime të shijes dhe/ose nuhatjes (të cilat nuk vërehen në këtë variant të Covid-19) dhe pa lëndime të rënda të vijave të poshtme të frymëmarrjes (të cilat, fatmirësisht janë më pak të shpeshta si në të vaksinuarit, po ashtu edhe në ata të prekurit nga Covid-19 i variantit “Delta” të infeksionit prej virusit Sars-Cov2), dhe me “test të shpejtë” ose “PCR-real time” për Sars-Cov2 NEGATIV…..“,- shkruan mjeku në Facebook.
Sipas Kalos, në vendin tonë mund të qarkullojë ky variant, për shkak të turistëve të huaj nga vende ku mutacioni tashmë është përhapur masivisht.
“Në mesin e të sëmurëve me shënjat e mësipërme, mundet të ketë, pa dyshim, edhe të infektuar me variantin “Delta” të virusit Sars-Cov2/Covid-19, sidomos persona shqiptarë ose të huaj të ardhur për pushime nga vende ku ky virus është mjaft i përhapur si Britania e Madhe, Francë, Itali, Holandë, Greqi, Spanjë, Gjermani, etj.
Këta persona duhet të jenë shumë lart të VETËNDËRGJEGJËSUAR, për t’u vetizoluar deri në sqarimin e shkakut të gjendjes së tyre klinike….”
Mjeku Tritan Kalo nënvizon edhe një herë se pandemia nuk ka mbaruar, ndaj duhet ndërgjegjësim i lartë dhe bën apel për vaksinim.
“Po ashtu edhe personeli i Qendrave Mjekësore në zonat e pushimeve dhe jo vetëm, duhet të rrisin vigjilencën epidemiologjike ndaj të sëmurëve me shënjat e mësipërme që ata/ato vizitojnë….. Në ndërkohë, kur dhe ku është e mundur, të MOS hezitojmë të vaksinohemi, që të ulim sa të jetë e mundshme numurin e të infektuarve nga virusi Sars-Cov2/Covid-19…..”Flama mbarëbotërore” nuk është shuar apo mposhtur plotësisht, edhe pse “pjesa më dramatike” e kësaj pandemie është luajtur tashmë, dhe VETËKUJDESJA si dhe KUJDESJA ndaj atyre që gjallojnë pranë nesh nuk duhet nënvlerësuar…”
