Një keqkuptim sa absurd aq edhe dramatik, ndërsa bënte Bungee jumping, i ka kushtuar jeten një vajze 25 vjeçare, pasi është hedhur pa qenë e lidhur me litarët mbrojtës.
Ngjarja ka ndodhur të dielen e kaluar në një urë në veri të Kolumbisë, ku 25 vjeçarja kishte shkuar me të fejuarin për të marrë pjesë për herë të parë në eksperiencen e hedhjes nga lartësia.
Vajza që humbi jetën është Yecenia Morales, një vajzë me origjinë nga Medellín, e cila të dielen kishte shkuar me të fejuarin në Amaga, një vend turistik i njohur në jug perëndim të Antioquia.
Sipas ndërtimit të ngjarjes nga autoritetet, 25 vjeçarja është hedhur gabimisht nga një urë, pa u lidhur me litarët elastikë, pasi ka keqkuptuar sinjalin e nisjes së punonjësve, i cili ishte për të dashurin e saj, që do të hidhej me të.
Në fakt vajza ishte pajisur me veshjen e nevojshme, por nuk ishte lidhur akoma me litarët kur është hedhur dhe ka rënë në shkëmb, para syve të të fejuarit.
Sipas të dhënave nga mjekësia, Yecenia Morales ka humbur jetën para se të mbërrinte në tokë, nga një arrest kardiak ndërkohë që binte poshtë.
