Sekretari Organizativ i Partisë Socialiste, Arben Pëllumbi, ka folur mbi procesin e zgjedhjeve të brendshme në Partinë Socialiste, si dhe për analizën që do të kryhet në këtë parti lidhur me votat e 25 prillit.
Një Komision i Posaçëm do të udhëheqë procesin e analizës, si dhe do të përgatisë metodikën që do të aplikohet në të gjithë territorin e vendit.
“Partia Socialiste është në fazën e konstituimit të komisionit të posaçëm, i cili do të merret me përgatitjen e metodikës, e cila do të bëhet e gjithë analiza që të kemi një standard analitik në të gjithë territorin e vendit. Jemi duke diskutuar faktin nëse në një zonë do të jetë drejtuesi i qarkut ai, i cili do të mbikëqyrë procesin apo do të delegojmë dikë tjetër”, tha ai.
Sipas tij, nga 15 shtatori deri në 15 nëntor PS do të ketë procesin e analizës në çdo qelizë dhe njëkohësisht të zgjedhjeve.
“Pas 15 nëntorit kalojmë në një rang më të lartë, kalojmë në nivelin e njësisë administrative, në nivel bashkie dhe më pas në nivel qarku, për ta përfunduar në mes të janarit”, tha ai.
Mes të tjerash Pëllumbi paralajmëron zgjedhje në kryesi.
“Përfundon edhe mandati një vjeçar i Kryesisë, Sekretariatit dhe Sekretarit të Përgjithshëm. Besoj që do të jetë edhe periudha që do të përkojë edhe me një mbledhje të re të Asamblesë Kombëtare, për të përcaktuar nëse do të kemi shtyrje të mandatit apo zgjedhje të reja, unë personalisht jam për zgjedhje të reja”, tha Sekretari Organizativ i PS.
