SPAK po verifikon pasuritë e 26 personave, 24 të arrestuar, si dhe dy ish-truprojave të Sajmir Tahirit, Paul Agustin Deda si dhe Hekuran Marku, të shpallur në kërkim ndërkombëtar, në kuadrin e operacionit anti-drogë “Shpirti” që u drejtua nga anti-mafia italiane.
SPAK ka dyshime se pasuritë janë krijuar nga trafiku dhe shitja e lëndëve narkotike. Operacioni “Shpirti”, sipas të dhënave zyrtare, çoi në shkatërrimin e 4 grupeve kriminale të trafikut të lëndëve narkotike, ndërsa operacioni u shtri nga Spanja, në Itali, Shqipëri dhe Malin e Zi.
Prokuroria është në fazën përfundimtare të hetimeve sa i takon përfshirjes së aktivitetit të tyre kriminal, ndërsa po kryen veprime të tjera për identifikimin e pasurive dhe vlerësimin nëse janë krijuar përmes burimeve të ligjshme.
Nga verifikimet ka rezultuar se janë një sërë pasurish në emër të këtyre personave dhe familjarëve të tyre.
Për këtë, prokurorët e SPAK kanë kërkuar informacion në zyrën e pasurive të paluajtshme, bankat e nivelit të dytë për të bërë të mundur identifikimin e të gjitha pasurive. Hetimet kanë nisur prej më shumë se dy vitesh, dhe gjatë kësaj faze janë vënë nën sekuestro disa pasuri me dyshimin se janë krijuar nga trafikimi i lëndëve narkotike. Prokuroria ka dyshime se, trafikantët kanë investuar paratë e fituara nga shitja e lëndëve narkotike, kryesisht në ndërtim, por edhe në hotele e resorte turistike, raporton ABCnews.
Referuar të dhënave zyrtare, nga operacioni “Shpirti” u vendosën nën sekuestro 12 pasuri të paluajtshme, përfshi apartamente, bare e restorante, vlera e të cilave përllogaritet në disa milionë euro. Verifikimit të pasurisë duket se nuk do i shpëtojnë as prokurori i Vlorës Maksim Sota, drejtuesi i Policisë Ilirjan Balla dhe dy zyrtarëve të tjerë të akuzuar se kanë lehtësuar aktivitetin kriminal të këtij grupi.
