Nënkryetari i LSI-së, Petrit Vasili, me anë të një postimi në rrjetin social shkruan se drejtësia me regji nga ana e Ramës është si orkestër çingijesh, që kap cironkat dhe jo peshkaqenët e pushtetit.
Vasili thekson se e gjitha është një lojë e dështuar, e një drejtësie, që funksionon me regji nga pushteti i Ramës.
“Nga çingijet tek cironkat, loja e dështuar e Drejtësisë me Regji!
Sot zhurma, që vjen nga Lushnja dhe nga Ministria e Brendshme i ngjan saktësisht një ahengu çingijesh për të shpërqëndruar vemendjen mediatike të opinionit nga çështjet, që akuzojnë Qeverinë.
Drejtësia e kapur sot funksionon vetëm si Drejtësi me Regjinë Propagandistike të Qeverisë së Ramës dhe në vend të peshkaqenëve kap cironka.
Drejtësia e kapur nuk heton çështje të mëdha dhe të rënda dhe për më keq akoma shumë prej tyre i mbyll fare po vetë”, shprehet Vasili.
Sipas tij, SPAK-u sipas regjisë së qeverisë me zhurmën e çingijeve, kërkon të krijojë idenë se kur vjen cështja te mbajtja e përgjegjësisë për korrupsionin Shqipëria qeveriset nga drejtorë dhe jo nga Kryeministri, Ministra dhe Sekretarë të Përgjithshëm.
“Pra për korrupsionin përgjegjësinë e kanë cironkat dhe jo peshkaqenët.
Ndaj Drejtësia me Regji bubullon si orkestër çingijesh, ndërkohë që këmbanat buçasin për përgjegjësinë e Qeverisë.
Cështje të medha si afera e Inceneratoreve, e Teatrit apo korrupsioni Parlamentar, që shkatërroi Parlamentin duke e kthyer në një zgjatim mafioz, që bën ligje me porosinë e oligarkëve, jane vetëm disa nga cështjet, për të cilat SPAK ka mbyllur gojën”, shkruan Vasili.