Gjykata e Apelit Tiranë, ka vendosur të ndryshojë vendimin e Gjykatës së Kurbinit që caktoi masën e “Detyrimit për tu paraqitur në polici”, për shtetasin, Nikoll Vorfin alias Besmir Fufi, i akuzuar nga prokuroria për “Kundërshtim dhe goditje të forcave të policisë” dhe “Kanosjes për shkak të detyrës”.
Prej datës 7 korrik 2021, Besmir Fufi, është shpallur në kërkim nga policia, pasi vendimi i gjykatës së Apelit Tiranë, ka caktuar masën e sigurisë “arrest në burg”.
Besmir Fufi është autor i dyshuar i ngjarjes së rëndë të ndodhur në Mamurras dhe rezulton të jetë i afërmi i ish-deputetit Mëhill Fufi.
Nga konflikti në Mamurras, mbetën të plagosur dy efektivët e policisë, Flamur Lleja dhe Ilir Zekaj, si dhe Nikollë Vorfi i cili dyshohet të ketë nisur sherrin.
Patrulla e tre efektivëve kanë tentuar që të ndalojnë dy të rinjtë që udhëtonin me makinën e tyre, pasi kishin kryer manovra të rrezikshme dhe kishin kaluar kundravajtje.
Në momentin që kanë kaluar policinë, ata nuk kanë ndaluar, në këtë kohë patrulla është vënë në ndjek të tyre duke mundur ti ndalojë në qendër të Mamurrasit.
Të rinjtë kanë hapur krahun dhe kanë ndaluar, më pas është afruar edhe patrulla e policisë. Brenda makinës kanë qenë dy persona, por sapo kanë parë që janë ndaluar nga policia, rreth 5-6 persona të tjerë janë afruar pranë të rinjve.
Nikollë Vorfi, ka dalë nga makina dhe ka qëlluar ndaj efektivëve të policisë duke goditur njërin prej tyre me sende të forta.
Pas kësaj një nga efektivët e policisë i identifikuar si, David Magani, ka hapur zjarr duke e plagosur në këmbë, por të plagosur kanë mbetur edhe dy kolegët e tij, fatmirësisht jashtë rrezikut për jetën.
