Një operacion policor kundër lojërave të jashtëligjshme të fatit, i koduar “gjysmëfinalja” (gjatë kohës kur u zhvillua luhej gjysmëfinalja e Euro2020, Angli-Danimarkë), ka çuar në pranga 35 persona mbrëmjen e djeshme.
“Operacioni u zhvillua në 12 qarqet e vendit në të njëjtën orë gjatë mbrëmjes së djeshme, kur u përfshinë 1 100 punonjës policie”, bënë me dije burime zyrtare. Konkretisht nga Sektorët për Hetimin e Krimit Ekonomik e Financiar në çdo DVP, Forca e Posaçme “Shqiponjat”, Patrullat e Përgjithshme dhe disa grupe të FNSH-së, nën drejtimin e Departamentit të Policisë Kriminale në Policinë e Shtetit.
Në të gjithë vendin janë kontrolluar 656 ambiente në të cilat dyshohej se mund të ushtrohej aktiviteti i kundërligjshëm i lojërave të fatit, kryesisht në fushën e basteve.
Nga kontrollet e ushtruara, në të gjithë vendin janë arrestuar në flagrancë 35 persona: konkretisht 19 persona në Tiranë, 6 persona në Vlorë, 5 në Shkodër, 2 në Durrës, 1 në Bulqizë, 1 në Fier e 1 në Korçë.
Janë proceduar penalisht në gjendje të lirë 18 persona: konkretisht 5 persona në Korçë, 3 në Tiranë, 3 në Shkodër, 2 në Vlorë, 2 në Berat, 1 në Elbasan, 1 në Mat dhe 1 në Fier.
Në cilësinë e provës materiale janë sekuestruar: 15 kompujtera, 5 makineta për lojëra fati, 16 tableta që shërbenin për vënie bastesh, 8 tavolina pokeri, 15 DVR, 41 aparate celular, 5 milionë lekë dhe prova të tjera materiale, të cilat shërbimin për ushtrimin e veprimtarisë së kundërligjshme të lojërave të fatit.