Komisioni i Pavarur i Kualifikimit vendosi sot shkarkimin nga detyra të Dritan Markut, prokuror në Prokurorinë pranë Gjykatës së Rrethit Gjyqësor Vlorë. Komisioni i Pavarur i Kualifikimit ka zhvilluar sot një seancë për shpalljen e vendimit për subjektin e rivlerësimit, prokurorit të Vlorës.
Trupa gjykuese e përbërë nga Valbona Sanxhaktari, Lulzim Hamitaj, Xhensila Pine pasi analizoi provat dhe faktet vendosi shkarkimin nga detyra të Dritan Markut, prokuror në Prokurorinë pranë Gjykatës së Rrethit Gjyqësor Vlorë.
Gjatë seancës dëgjimore, KPK konstatoi se Dritan Marku ka cënuar besimin e publikut tek drejtësia në nënshkrimin e një kontrate kapari dhe një kontratë shitje për një apartament në Vlorë, këtë të fundit pa praninë e palës blerëse, me qëllim justifikimin e burimeve financiare për krijimin e pasurive të mëvonshme.
Dritan Marku e ka nisur karrierën në sistemin e drejtësisë si oficer i Policisë Gjyqësore në vitin 2000. Ai ushtron funksionin e prokurorit në Prokurorinë e Vlorës për gati dy dekada.
Lexo edhe:
KPK ngre dyshime se prokurori Dritan Marku fabrikoi dokumente për justifikimin e pasurive
