Rozeta Ivanova u zgjodh sot si anëtare e dytë zëvendësuese si Komisionere në Komisionin e Pavarur të Kualifikimit dhe Irena Nino u zgjodh si anëtare e parë zëvendësuese si Komisioner Publik.
Komisioni “ad hoc” për plotësimin e vendeve vakante për anëtarë zëvendësues për Komisioner të Komisionit të Pavarur të Kualifikimit dhe anëtarë zëvendësues për Komisioner Publik u mblodh sot nën drejtimin e kryetarit Ulsi Manja.
Komisioni fillimisht miratoi procesverbalin e datës 25.06.2021.
Më pas Komisioni shqyrtoi miratimin e listës për votim.
Manja u shpreh se është përcaktuar qartë që do të përdoret për votim lista e kandidatëve të kualifikuar në 2017-ën kur edhe Kuvendi përmbylli hedhjen e shortit për organet e Vetingut KPK, KPA dhe Komisionerin Publik”.
“Sot do të miratojmë listën e kandidatëve për votim për KPK dhe Komisioner Publik. Për pozicionin e KPK kanë shprehur interes 5 kandidatë që mbetën pa u kualifikuar në 2017, por që plotësonin kriteret. Për pozicionin e Komisionerit Publik nga 35 kandidatë që mbetën pa u kualifikuar në 2017, por që plotësonin kriteret kanë shprehur interes 14 kandidatë”, tha Manja.
Ai propozoi që lista përfundimtare për miratim për Komisioner, të KPK të kishte 4 kandidatë dhe ajo për Komisioner Publikë të kishte 12 kandidatë, pasi të tjerët nuk plotësonin kriteret.
Më pas u bë një prezantim i shkurtër i CV-ve të kandidatëve.
“Kandidatët plotësojnë kriteret dhe është kryer verifikimi i tyre në të tre komponentët”, tha Manja.
Më pas, për Komisonerë të KPK u miratua lista për votim me 4 kandidatë Arben Lena, Irena Nino, Rozeta Ivanova dhe Suzana Pasha.
Ndërsa për Komisionerë Publikë u miratua lista me 12 kandidatë, Albana Tushe, Arte Gjonaj, Bledar Cenameri, Edmond Kasmi, Eliona Lloja, Irena Nino, Liri Llukani, Mirjon Theodhosi, Orjela Shishi, Rovena Pregja, Suzana Hoxha, Suzana Pasha.
Komisioni u tërhoq më pas për të kryer votimin për dy anëtarët zëvendësues nëpërmjet një sistemi elektronik që mundëson votimin e fshehtë, ku secili anëtar voton për një kandidat.
Pas votimit të fshehtë elektronik, Manja u shpreh se në mbledhje dhe votim nga 12 anëtarë të Komisionit “Ad hoc” morën pjesë 11 anëtarë.
“Pas kryerjes së votimit të fshehtë elektronik për anëtar i dytë zëvendësues si Komisionerë në KPK, rezultati i votimit rezulton Rozeta Ivanova 6 vota, Irena Nino 4 vota, Suzana Pasha 0 vota dhe Arben Lena 1 votë. Fitues për pozicionin e anëtarit të dytë zëvendësues për Komisionerë pranë KPK shpallet Rozata Ivanova me 6 vota”, tha Manja.
“Për anëtarin e parë zëvendësues si Komisioner Publik, në përfundim të votimit të fshehtë elektronik rezulton Albana Tushe 1 votë, Irena Nino 10 vota, dhe kandidatët e tjerë zero vota. Fitues për pozicionin e anëtarit të parë zëvendësues për Komisioner Publik rezulton Irena Nino”, u shpreh ai.
Në fund, Komisioni miratoi me 10 vota pro vendimin për miratimin e listës me dy anëtarët zëvendësues, për anëtarin e dytë zëvendësues në KPK Rozeta Ivanova dhe për anëtar i parë zëvendësues si Komisioner Publik, Irena Nino.
