Arben Kraja, kreu i SPAK, u shpreh sot se është provuar dhe faktuar përfshirja e zyrtarëve publikë, si prokurorë, drejtues policie, punonjësish të pushtetit vendor, duke favorizuar aktivitetin kriminaö në trafikun e drogës.
Referuar operacionit të koduar “Shpirti” që çoi në ekzekutimin e 28 masave të sigurisë në Shqipëri, Kraja tha se janë ngritur akuza edhe për pastrim parash.
“Rreth 1 muaj më parë kam thënë se do i shkojmë deri në fund operacionit, dhe gjithkush që është i përfshirë do të përballet me ligjin”, tha Kraja.
Ai u shpreh se tashmë është e provuar përfshirja e zyrtarëve publikë, ndërsa shtoi se 1 vit më parë u sqarua faza e parë e operacionit. Sipas tij, suksesi i këtij operacioni është rezultat i bashkëpunimit dhe shkëmbimit të informacionit mes SPAK dhe autoriteteve italiane, por edhe i faktit se kemi 4 të penduar, që kanë rrëfyer skemën e funksionimit të kësaj organizate, nga kultivimi i kanabisit te trafikimi i saj drejt Italisë.
4 bashkëpunëtorë të drejtësisë, të cilët dhanë informacione duke ndihmuar autoritete shqiptare dhe ato italiane, ku në kuadër të operacionit ‘Shpirti’, kanë zbuluar trafikun ndërkombëtar të drogës, korrupsionit me detyrën dhe pastrimit të parave, dhe si rezultat janë lëshuar 38 urdhër-arreste, nga këta 10 persona të arrestuar më parë.
IIirjan Balla, shefi i sektorit kundër trafiqeve në Policinë e Shtetit, Prokurori i Vlorës, Maksim Sota, ish-oficeri i policisë, Festim Lelaj, i proceduar më parë për trafik narkotikësh si dhe Saimir Kurti drejtor i zyrës së Punës në Kavajës janë disa nga emrat e publikuar deri më tani.
