Zv.ministrja e Shëndetësisë, Eugena Tomini, shprehet se situata epidemiologjike në Shqipëri është vërtet nën kontroll, por të gjitha strukturat janë në alert për të kapur në kohë rastet e mundshme.
Ajo thotë se deri më tani në Shqipëri nuk janë konfirmuar raste të variantit Delta të Covid-19, por shton se sigurisht që jemi të rriskuar.
“Delta” një ndër variantet e Covid me transmetim të lartë sipas Organizatë Botërore të Shëndetësisë po tregohet agresiv dhe tek të rinjtë ndërsa vaksinat po shfaqin efikasitet ndaj tij. Prandaj Tomini apelon për të respektuar kalendarin e vaksinimit.
“Është shumë e rëndësishme të bëjnë kalendarin e plotë të gjithë individët që kanë aplikuar një dozë, të gjithë ata që e kanë kaluar që të mbrohemi nga variantet”, thekson ajo për Abc.
Për t’i dhënë mundësi moshave mbi 18 vjeç për të marrë dozën e antitrupave kundër Covid Ministria e Shëndetësisë do të kthej ditët e hapura të vaksinimit në korrik dhe gusht.
Ndërkohë që dy ditët e çeljes së kësaj fushate u vaksinuan rreth 25 mijë persona ku 17 mijë prej të cilëve morën injeksionin e parë.
