Ndryshimi i masës së sigurisë për një të pandehur nga arrest me burg në gjendje të lirë ose arrest shtëpie, kundrejt një rryshfeti prej 2 mijë euro, dyshohet se është shkaku i arrestimit të drejtuesit të Prokurorisë së Kukësit, Edmond Karriqi.
Nga raportimet dyshohet se Karriqi akuzohet se ka marrë shumën prej 2 mijë euro për të ndryshuar masën e sigurisë.
Raportohet se SPAK kishte vënë nën përgjim prokurorin pas sinjalizimeve që kishte marrë. Karriqi ishte caktuar si drejtues i Prokurorisë së Kukësit në mars 2021 me një vendim të KLP. Ky është prokurori i dytë, pas atij të Sarandës, që arrestohet brenda pak javësh, për akuzën e korrupsionit.
Policia e Shtetit në bashkëpunim me Prokurorinë e Posaçme Anit-Korrupsion kanë arrestuar rreth orës 15:00 të ditës së sotme prokurorin e Kukësit, Edmond Karriqi, si dhe shoferin e tij, identiteti i të cilit nuk bëhet ende me dije.
Burime bënë me dije që prokurori u arrestua sëbashku me shoferin e tij, ndërkohë që hetuesit kanë bastisur dhe shtëpinë e tij për të ushtruar kontroll.
Në pranga kanë përfunduar dhe shtetasi Isuf Gega me detyrë sekretar në këtë prokurorinë e Kukësit së bashku me një person tjetër.
Prokurori Edmond Karriqi është sjellë me automjetin e drejtuesve të policisë në Drejtorinë e Policisë së Tiranës, ndërkohë që pritet deklarata e SPAK për të hedhur më shumë dritë mbi personat e ndaluar si dhe dosjen për të cilën ata akuzohen për korrupsion.
