Vllaznia do nënshkruajë me Ngissah Bismark. Ganezi 23 vjeçar cilësohet si “Ekubani i ri” teksa ka qenë për disa vite në pronësinë e Chievos në Itali. Shtatëlarti qysh prej 2015 ka qenë pjesë e klubit nga Serie A, duke u huazuar në disa ekipe në liga të ndryshme në Itali.
Ka qenë vetë presidenti Xhaferi që ka konfirmuar se në Shkodër do mbërrijë një supersulmues, me 23 vjeçarin që shihet si një ndër lojtarët premtues që po afrohen në merkato. Duket se shitja e Dungës ka lënë hapësira boshe në Shkodër, me ganezin që do jetë një ndihmë dhe konkurrent i Dilaver.
Bismark ka zhvilluar karrierën te Imolese, Vis Pesano dhe Pro Sesto. 23 vjeçari vjen në Shkodër si transfer i lirë, teksa luan edhe në krahët e sulmit. Marrëveshja është gjetur mes palëve, teksa mbetet të hidhet firma në kontratë pas vizitave mjekësore.
