Ipeshkëvi i Rrëshenit, dom Gjergj Meta ka reaguar për ngjarjen e rëndë në Velipojë, ku u vranë katër persona. Dom Gjergj Meta thekson se i uron secilit më të mirën në jetë, sidomos paqen e zemrës.
Postimi i Dom Gjergj Metës:
Të dashur miq e jo miq,
Kushdo që lexon këto rreshta,
Do të doja t’ju uroja një të djelë të bukur sikurse bëj shpesh, por nuk më bëhet, sidomos kur mendoj familjen e shuar dy ditë më parë dhe katër të vrarët mbrëmë në Velipojë.
Atëherë po i them:
Kush martohet sot u gëzoftë!
Kush lind sot, pastë jetën e gjatë!
Kush po pushon, pushoftë i qetë!
Kush po punon, ia bekoftë Zoti djersën!
Kush po hidhërohet, ia ngushëlloftë Zoti zemrën!
Kush po vuan, paftë dritë sa më shpejt në fund të tunelit!
Kush ka humbur të afërmit, mos paftë më keq me sy!
Kush po lutet, iu dëgjoftë lutja!
Secilit i uroj atë çka mund të jetë më e mirë për të sot, sidomos paqen e zemrës!
+ D. Gjergji