Një masakër që kishte fillesën në një konflikt për shezlongët e plazhit shkaktoi 4 viktima dhe 2 tëplagosur në Velipojë.
Viktima të përplasjes me armë mes dy familjeve, Ferracaku dhe Gocaj, mbetën, Kujtim Ferracaku 59 vjec, vëllezërit Xhovani dhe Edmond Gocaj 25 dhe 38 vjec dhe Myzerim Zeneli 20 vjec. Të plagosurit janë; Hasan Ferracaku 54 vjec dhe Elmedin Tyli 17 vjec.
Drejtori i Policisë së Shkodrës Niko Brahimaj tha se gjithcka ka nisur në 00:30 pas sherrit për ndarjen e rërës për vendosjen e shezlongëve në plazhin para hoteleve të Kujtim Ferracaku, “Fantazia” dhe të Gocajve.
Pas debatit verbal, Kujtim Ferracaku bashkë me vëllanë, Hasanin që mbeti i plagosur janë përplasur me armë me vëllezërit Xhovani dhe Edmond Gocajn, që mbetën të vdekur nga plumbat.
Viktima e katërt është Myzerim Zeneli, punonjës i shezlongëve. Brahimaj tha se u sekuestruan kamerat e sigurisë së hoteleve dhe një pistoletë, ndërsa shtoi se “dyshohet se u përdorën dy armë“.
Policia thotë se Hasan Ferracaku dhe Elmedin Tyli dyshohen si autorë të përfshirê në konfliktin e armatosur. Shumë shpejt, tha Niko Brahimaj, do të ketë të arrestuar për masakrën.
“Për hetimin dhe zbardhjen e ngjarjes menjëherë është ngritur një grup posaçëm hetimor me specialistë të strukturave hetimore në DVP Shkodër dhe të Drejtorisë për Hetimin e Krimeve ndaj Personit dhe Jetës në Departamentin e Policisë Kriminale në Policinë e Shtetit, nën drejtimin e Prokurorisë së Rrethit Gjyqësor Shkodër.
Në ndihmë të Policisë vendore ka shkuar FNSH Shkodër dhe një grup i Forcave Speciale Renea. Grupi hetimor po punon për zbardhjen e dokumentimin e plotë të rrethanave dhe shkakut të kësaj ngjarjeje” mbyllet njoftimi i policisë Shkodër.
RENEA, FNSH dhe policia lokale kanë blinduar Velipojën dhe të gjithë veriun në kërkim të personave të përfshirë në konfliktin që la katër të vdekur pas sherrit për shezlongët.
Por si ndodhi ngjarja?
Paraprakisht mësohet se Kujtim Ferracaku, pronar i restorant “Fantazia” u konfliktua me pronarët e hotel “Gocaj” për shezlonët në plazh.
Si pasojë mbeti i vrarë Kujtim Ferracaku, punonjësi i shezlongeve dhe dy viktimat e tjera janë nga familja Gocaj.
Nga plumbat ka mbetur i plagosur edhe vëllai i viktimës, Kujtim Frracakut bashkë me një tjetër person. Kujtim Ferracakut që u vra sonte tre vite më parë iu ekzekutua djali në Shkodër.
