Qeveria nuk ka ndër mend të ndalet me politikën e transferimit të shërbimeve publike si monopol tek kompanitë private. Pas konçesionimit në seri të shumë shërbimeve në sektorin shëndetësor, brenda muajit tjetër qeveria do të transferojë tek privati një tjetër shërbim të rëndësishëm publik, atë të mbikëqyrjes së industrisë së lojërave të fatit.
Ministria e Financave shpalli në faqen zyrtare të Agjencisë së Prokurimeve njoftimin për koncesionin, tenderi i të cilit do të zhillohet në datën 12 janar. Sipas njoftimit objekti i koncesionit është; ndërtimi, zhvillimi, operimi dhe mirëmbajtja e “Sistemit Qendror të Monitorimit On-Line për Industrinë e Lojërave të Fatit në Republikën e Shqipërisë, për një periudhë 30-vjeçare.
Miliona dollarë
Në shtator të këtij viti, Këshilli i Ministrave miratoi një vendim, i cili i hap procesit për të dhënë me koncesion tek privatët ndërtimin dhe operimin e sistemit qendror elektronik për mbikëqyrjen e industrisë së bixhozit.
Vendimi i qeverisë ka përcaktuar vetëm kriteret kualifikuese për kompanitë që duhet të marrin pjesë, ndërsa termat financiare të koncesionit do të qartësohen vetëm pas përfundimit të tenderit në datën 12 janar.
Sistemi qendror elektronik i mbikëqyrjes së lojërave të fatit do të ndërtohet nga vetë kompania private. Pas ndërtimit ajo do të ketë të drejtën ta përdorë serverin për 30 vjet dhe për këtë do të shpërblehet duke marrë një përqindje të caktuar të totalit të taksave që mblidhen nga lojrat e fatit.
Se sa do të jetë pjesa që merr konçesionari, kjo do të përcaktohet nga tenderi. Ministria e Financave ka vendosur që kriteri financiar të ketë vetëm 30 për qind të pikëve, ndërsa 70 për qind e pikëve të tjera i përkasin kriterit teknik dhe atij profesional.
Buxheti i shtetit arkëton mesatarisht 50 milionë dollarë në vit nga taksat e lojërave të fatit. Edhe pse pjesa që do të marr private do të dalë vetëm pas garës së tenderit, është e qartë se ky koncesion do i sigurojë kompanisë fituese deri në dhjetëra milionë dollarë, përgjatë periudhës së tij 30-vjeçare. /Syri.net/
