Nga BoldNews.al
Një nga streset më të mëdha të banorëve të Tiranës është parkimi. Dy policitë, ajo rrugore dhe ajo bashkiake, janë kthyer në gjobëvënës. Duke shtuar edhe trafikun, në këto ditë të nxehta, udhëtimi në rrugët e kryeqytetit është bërë tmerr për këdo. Situata është kaotike, ndërsa Lali Eri duket se është dorëzuar dhe do të veprojë me dorë “të hekurt”. Tirana Parking, e drejtuar nga Eglantina Zërë, për të cilën denoncuam para pak ditësh se i ka dhënë familjarëve të vet një kioskë brenda Terminalit të Autobusëve të Jugut, ka hapur një tender me objekt “masterplan për parkimet”.
Objekti i tenderit është “masterplani dhe plan biznesi për parkimet në qytetin e Tiranës”. Fondi limit për këtë tender është 12.466.667 lekë, ndërsa afati kohor për ekzekutimin është 4 muaj. BoldNews shfletoi dokumentet e këtij tenderi, ku detajohet puna që kërkohet. Në fillim jepet një rezyme e situatës, ku pranohet se “Tirana gjithmonë e më shumë e ka vuajtur mbingopjen e automjeteve në lidhje me parkimin”. Sipas saj, Bashkinë e Tiranës gjenden mbi 200.000 automjete ose rreth 250 automjete për 1.000 banorë. Ndërkohë, Tirana Parking administron në total 7 270 parkime në rrugë, 1 429 parkime në sheshe dhe 5841 parkime për rezidentë.
Një nga pikat që kërkohet të bëhet me këtë masterplan është edhe analiza e gjendjes ekzistuese. “Kërkohet analiza e trafikut aktual për të përcaktuar llojet e udhëtimeve me automjet, për punë, për argëtim, etj. si edhe vend-nisjet dhe vend-mbërritjet e këtyre udhëtimeve”, thuhet në këtë dokument.
Ndërkohë, më tej është edhe “bomba” e Veliajt. Në një pikë synohet “identifikimi i nevojave përsa i përket shërbimit të parkimit publik”. Dhe, të kategorizohen mjetet sipas arsyes së udhëtimit dhe zonës specifike ku nisin dhe përfundojnë këto udhëtime. Në pikën “ndërhyrjet e propozuara” synohet që “këto ndërhyrje duhet të jenë në përputhje me legjislacionin në fuqi sa i përket zonimit parkimit dhe ndarjes së vend-parkimeve në secilën rrugë”. Synohet që të bëhen rrugë të tjera me pagesë, zona për parkime për rezidentë, zona për sheshe parkimi apo edhe parkime nëntokësore.
Duke shfletuar këto dokumente, lihet të kuptohet se Veliaj ka një plan të qartë: të bëjë qendrën e Tiranës me trafik të kufizuar. Pra, t’i vendosë një tra’ që të kalojnë vetëm “mjetet” e preferuara!
