Trajneri Lëv iu fal në fund një goli të Leon Goreckës, i cili kualifikoi gjermanët për në fazën e 1/8-ve. Por, 61-vjeçari tha pas ndeshjes se kurrë nuk e mendoi eliminimin, ndryshe nga Joshua Kimish që gjatë lojës kishte flirtuar me mendimin se kjo do të ishte ndeshja e fundit për skuadrën e tij në Europian.
“T’ju them të drejtën nuk e çova kurrë në mend që do të eliminoheshim sot (dje). Treguam një moral të lartë, luftuam deri në fund. Ky është shpirti i skuadrës që dua. Hungaria bëri një ndeshje të madhe dhe ashtu siç e thashë dhe para ndeshjes, do të ishte një sfidë jo e lehtë. Në ndeshjen me Portugalinë dhe Francën treguan se çfarë ishin në gjendje të bënin. Luajtëm në grupin më të vështirë të mundshëm dhe fakti që arritëm të kualifikoheshim më gëzon shumë”, u shpreh Lëv.
PËR VËSHTIRËSITË – “Hungarezët luajtën me 10 lojtarë në gjysmëfushën e tyre dhe kjo e bëri dhe më të vështirë lojën për ne. Më pas erdhi goli i parë i cili na shokoi. Presioni sa vinte dhe shtohej dhe në fund, vetëm më një gol të tillë mund të shpëtonim. Leon bëri diferencën jo vetëm se shënoi, por edhe në freskinë që i dha skuadrës në mesin e fushës. I thashë atij që të futej më shumë në zonë, Musiala bëri gjithashtu disa veprime të mira. Mund të them që jam i kënaqur”.
PËR ANGLINË – “Do të jetë një ndeshje për tu mos humbur. Në Uembli do të përplasen dy kombëtare historike. Në Angli jetohet për ndeshje të tilla. Mendoj që ky fakt na motivon për të bërë më të mirën. Do ta përgatisim në mënyrën e duhur këtë ndeshje duke nisur nga dita e nesërme (sot). Jam i bindur që do të shihni një Gjermani shumë ndryshe nga ajo që patë sot (dje). Shpresoj që të kem të gjithë lojtarët në dispozicion. Le të shohim se çfarë do të ndodhë”.
