“Është një punë vullnetare, nuk është punë me pagesë. Nuk ka ardhur ende referimi nga gjykata. Kemi mbajtur një qëndrim korrekt si me të gjithë të burgosurit.
Lul Berisha do të angazhohet në një nga ndërmarrjet e bashkisë si vullnetar. Bashkia ka përdorur procedura standarde si për të gjithë të burgosurit”. Ky është dhe reagimi i kryebashkiaku i Durrësit, Vangjush Dako për ndihmën që ai i dha Lulzim Berishës të dalë nga burgu, duke i siguruar punë në bashki.
Vangjush Dako është nën akuzë nga Zëri i Amerikës dhe BIRN se doli garant për të liruar nga burgu kreun e një prej bandave më famëkeqe në vend, i cili u arrestua nën akuzën për vrasjen e 5 personave dhe krijim të organizatës kriminale.
Dako nuk tha se ç’punë do të bëjë Lul Berisha, si janë orarët dhe si do të mund të punojë ai në komunitet i lirë, kur mbi të rëndojnë 5 vrasje dhe ai mund të jetë objekt hakmarrjeje. Kryetari i Bashkisë së Durrësit foli për procedura standarde si për të gjithë të burgosurit e tjerë. Por a është Lulzim Berisha si të gjithë të tjerët? Ai u dënua me burg për jetë si person me rrezikshmëri të lartë, një vendim që u ul në 25 vjet me procedura gjyqësore. Në opinionin publik janë ngritur dyshime të forta mbi vendimet e të gjithë gjyqtarëve që gjykuan Lul Berishën, e së fundi edhe mbi garancinë e ofruar nga Vangjush Dako që i dënuari për 5 vrasje të përfitojë lirinë, vetëm pas 10 vjetësh burg.
