Tre të rinj janë arrestuar nga policia e Durrësit pasi akuzohen se mashtronin turistët nëpërmjet lojërave me letra, duke iu marrë shuma të ndryshme parash.
Gjatë kontrollit fizik, njërit prej të arrestuarve iu gjet dhe sekuestrua një sasi kanabisi.
“Shërbimet e Komisariatit të Policisë Durrës, në vijim të punës për parandalimin e krimeve që ndodhin kryesisht gjatë sezonit turistik, kanë vijuar kontrollet përgjatë vijës bregdetare dhe në stacionet e autobusëve ku zbresin turistët. Gjatë kontrollit, shërbimet e Policisë kapën dhe arrestuan në flagrancë duke mashtruar një shtetas kosovar, shtetasit: Bruxhino Murati, 28 vjeç, Albi Xhixha, 19 vjeç banues në Shijak dhe Klejdi Dusho, 19 vjeç, banues në Skrapar. Këta shtetas, në bashkëpunim me njëri-tjetrin, organizonin lojëra me letra me turistët dhe përfitonin para prej tyre nëpërmjet mashtrimit. Gjatë kontrollit fizik, Albi Xhixhës iu gjet dhe sekuestrua në cilësinë e provës materiale një sasi lënde narkotike kanabis sativa”, njoftoi policia.
Materialet i kaluan Prokurorisë së Rrethit Gjyqësor Durrës, për veprat penale ‘Mashtrimi’ kryer në bashkëpunim dhe ‘Prodhimi dhe shitja e narkotikëve’”, shtuan të njëjtat burime.
