Detaje të reja edhe më tronditëse dalin në dritë ditë pas dite nga vrasja e 20-vjeçares Caroline Crouch në Greqi. Në një raport të zbuluar nga protothema.gr thuhet se e reja ka vdekur në agoni.
“Ishte një agoni dhe jo një vdekje e menjëhershme”, thuhet në raportin mjeko-ligjor, pasi piloti pretendoi se vrasja kishte ndodhur pas një zënke.
“Nga të dhënat e autopsisë, konstatohet se pas një përleshje fizike, ndodhi vdekja, pasi dëmtime konstatohen në pjesë të ndryshme të trupit të 20-vjeçares. Në fakt, Babis Anagnostopulos duket se ka synuar ta vrasë gruan e tij, pasi ai e mbyti atë për të paktën 5-6 minuta duke mos e lënë të marrë frymë”, shkruan Proto Thema
Në raport thuhet se lëndime u gjetën në buzët dhe gjuhën e viktimës, si dhe në qafë ku shenjat mund të jenë për shkak të përdorimit të një sendi të mprehtë.
Por ajo që është më e frikshme, është shkalla e dëmtimit të fytyrës, pasi identifikohen njolla të shumta të mbytjes.
Gjakderdhja e gjerë është gjithashtu e dukshme në sy.
Detajet rrëqethëse që dalin nga raporti mjeko-ligjor mbështesin bindjen, të shprehur në orët e fundit nga kriminologët, se autori mund të jetë duke mashtruar dhe se e ka planifikuar krimin e tij.
Nëna e britanikes është duke përjetuar momente të vështira tashmë që e vërteta u zbulua.
Sipas mediave greke, si në familjen e së resë, ashtu edhe në familjen e 33-vjeçarit, situata është dramatike, siç bëjnë me dije edhe burimet pranë tyre.
Nëna e Caroline është në gjendje shoku, pasi nuk kishte dyshuar asnjëherë tek dhëndri i saj, madje duket se ajo nuk ishte në dijeni për mosmarrëveshjet e çiftit.
“Susanna (nëna e Caroline) është shumë e revoltuar. Është e mbushur me mllef dhe ka shumë arsye të jetë kështu. I duket sikur po përjeton një makth. Ajo i kishte mbajtur të gjitha shpresat tek Babis, sepse e shihte si një vazhdim të vajzës. Nuk kishte dyshuar kurrë tek ai…”, ka treguar për mediat Hariklia Theodorou.
Ajo tha se Susanna e kishte pikë të dobët të bijën dhe kjo kishte qenë arsyeja pse ajo nuk donte ta mërziste me problemet e martesës së saj.
“Kjo është arsyeja se pse ajo nuk donte që ta mërziste të ëmën. Ajo ishte shumë krenare për martesën e tyre, për dhëndrin dhe për mbesën. Mendoj që Caroline nuk donte që t’ia prishte këtë imazh që ajo kishte krijuar”, vazhdoi ajo.
Ndërkohë, e pyetur për Babis ajo tha se ai ishte gjithnjë duke qeshur dhe se ishte shumë i dashuruar me Caroline.
“Ai ishte gjithnjë duke qeshur, nuk ishte nevrik. Nuk i tregonte emocionet e forta as gëzimin, as hidhërimin. Ishte shumë i dashuruar, vinte në ishull vetëm për t’i sjellë një buqetë me lule”, tregoi Theodorou.
Por edhe familja e pilotit 33-vjeçar është në një gjendje të rëndë. Vëllai i tij është i shkouar dhe ende nuk e beson çfarë ka ndodhur.
“Vëllai i tij është në shok, nuk mund ta besojë, ai është ende këtu në Alonissos. Nëse i njihni prindërit … Ata janë shenjtorë, të arsimuar, nuk e di se si do ta menaxhojnë atë”, ka thënë e afërmja e Susane.
