Kryetari i Partisë Demokratike Lulzim Basha ka akuzuar Kryeministrin Edi Rama për gjendjen në të cilën ndodhet vendi dhe për bllokimin e hapjes së negociatave për integrimin në Bashkimin Europian, duke deklaruar se KiE e krahason Shqipërinë me vendet e diktaturës.
Basha tha sot se këto konkluzione nuk lënë vend për interpretim dhe se Europa nuk gënjehet me lugën bosh të propagandës dhe mashtrimit.
Duke folur për mediat pas mbledhjes së grupit parlamentar, Basha theksoi se Qeveria nuk merr përsipër që të organizojë zgjedhje të lira dhe të ndershme.
“Këshilli i Europës i ka publikuar konkluzionet e veta dhe ato nuk lënë vend për interpretime. Gjendja në vend shumë e rëndë. Provë se Europa nuk gënjehet me lugën bosh të propagandës e mashtrimeve. Lajmi i mirë këtu është se duke mos lënë shteg për interpretim çmonton spekulimet dhe hap rrugën për marrjen e përgjegjësive. Duke mohuar problemet e rëndë me drogën, krimin dhe mos marrjen e përgjegjësive për zgjedhje të lira dhe të ndershme qeveria ka refuzuar të marrë përgjegjësi për daljen nga kjo situatë”, tha Basha.
Ai theksoi se është “turp për Shqipërinë dhe shqiptarët, që në fund të vitit 2016 në vend të marrin lajmin e mirë për çeljen e negociatave, të marrin një vlerësim të denjë për vendet diktatoriale”.
“Nga njëra anë kemi kryeministrin, i cili edhe mbrëmë refuzoi të pranojë këtë të vërtetë që nuk e thotë vetëm media shqiptare e qytetari shqiptar por institucionet evropiane.
Unë dhe PD do të bëjmë çdo gjë për miratimin e Vettingut sipas kushtetutës për zbatimin e dekriminalizimit dhe për zgjedhje të lira dhe të ndershme”, deklaroi kreu i PD.
