Pas vendimit të Këshillit të BE-së për pranimin e rekomandimit për hapjen e negociatave me Shqipërinë, grupi politik në Gjermani CDU/CSU ka lëshuar një deklaratë. Grupi parlamentar i kancelares Angela Merkel dhe aleatëve të saj në qeveri ka vënë një kusht kryesor para hapjes së negociatave, kusht që ka të bëjmë më drogën.
Në emër të grupit parlamentar CDU/CSU kanë folur zëdhënës për politikat e jashtme, Jurgen Hardt dhe reporteri përgjegjës, Thorsten Frei. “Shqipëria duhet të bëhet vend anëtar i BEsë. Gjermania e ka theksuar gjithnjë këtë. CDU/CSU mbështet këtë princip. Por, sidoqoftë, vendi duhet të plotësojë të gjitha kriteret e anëtarësimi”, thuhet në deklaratë.
Më pas listohen dhe kriteret që Shqipëria duhet të plotësojë për të hyrë në BE, duke filluar që nga zbatimi i reformës në drejtësi dhe luftën kundër korrupsionit dhe krimit të organizuar. Sipas tyre duhet t’i nënshtrohen verifikimit rreth 800 gjyqtarë dhe prokurorë. Përveç kontrollit të pasurisë, Gjermania propozon që të përfshihet dhe programi i lehtësimit të dënimeve për kriminelët që bashkëpunojnë për demaskimin e zyrtarëve të drejtësisë.
Por, grupi më i madh parlamentar në Bundestag ka vendosur një kusht të saj për Shqipërinë.
“CDU dhe CSU është e shqetësuar për nivelin e ulët të progresit në luftën kundër krimit të organizuar dhe krimit të lidhur me drogën. Nuk duhet të ekzistojë pamja se politika shqiptare është e përfshirë dhe mbulon ekonominë e nëndheshme. Para se BE të hapë negociatat me Shqipërinë, prodhimi dhe trafikimi i drogës duhet të reduktohet në mënyrë drastike. Në rrugën drejt BE-së nuk do të këtë asnjë lëshim për Shqipërinë. Para se Bundestagu të miratojë hapjen e negociatave duhet të realizohen një numër kushtesh”, përfundon deklarata.
