I rikthyer në kombëtaren franceze pas 6 vitesh, Karim Benzema, thotë se është gati. “Ndjej krenari dhe lumturi dhe këto ndjenja bëhen më të forta çdo ditë që kalon”.
Në një intervistë për UEFA-n, sulmuesi i Real Madrid thotë se përgatitja po shkon mirë. “I njihja që më parë disa prej shokëve të skuadrës, stafin teknik i njoh të gjithë dhe jam njohur edhe me lojtarët e rinj. Ajo që është më e rëndësishme është që gjërat të funksionojnë në fushë”.
33-vjeçari ndihet shumë ndryshe, psikologjikisht dhe fizikisht. “Jam bërë baba dhe niveli i besimit është rritur ndjeshëm. Dua të jap më të mirën në fushë”, thotë ai.
Në repartin e sulmit ai gjen dy prej lojtarëve më të mirë në botë, Griezmann dhe Mbappe. “Ata janë mësuar të luajnë bashkë, ndërsa unë sapo kam arritur. Kështu që unë duhet të përsëris në kombëtare formën që kam treguar me Real Madrid. Nuk e di nëse fjala përshtatje është e duhura, por kemi lojtarë aq të mirë saqë do të mi bëjnë gjërat e lehta. Objektivi im është i thjeshtë, dua të fitoj”.
