Ndërsa po ndërtohej hidrocentrali i Vaut të Dejës rreth 60 vite më parë, pak metra larg tij u ngrit edhe qendra kulturore si dhuratë për komunitetin e zonës.
E tillë shërbeu përgjatë viteve të diktaturës, si një vatër e kulturës, për tu trashëguar deri në ditët tona.
15 vite më parë, në 2006-en ju bënë disa ndërhyrje dhe më pas u la në harresë për të ardhur deri më sot në këtë gjendje shkatërrimi thuajse të plotë.
Kjo ka funksionuar gjatë gjithë jetës, sallë shfaqjesh, takimesh. Më parë ka qenë edhe filmi, kurse kohët e fundit më shumë shfaqej, takime, ka funksionuar shumë mirë, ka pasur një sukses të jashtëzakonshëm vitet e fundit,” tha ish-drejtuesi i qendrës Kulturore, Viktor Paloka.
Sot në këtë qytezë mungon një hapësire për të zhvilluar aktivitete, duke përjashtuar rastet kur ato mbahen në shesh të hapur, apo mjediset e katedrales “Nënë Tereza”.
“Rreth viteve 2017 kjo ra totalisht. Arsyeja ishte kulmet që i hoqi era, pastaj ato kulme e zhveshën krejtësisht. Vitet e fundit ne as prova nuk kemi bërë këtu, i kemi zhvilluar ku kemi gjetur në shkollë, në Kishë,” tha ai.
2 vite më parë në hyrje të kësaj qendre u vendosen përkohësisht inspektorët e zyrës vendore të arsimit, por godina nga amortizimi i skajshëm mbetet një rrezik për këdo që e frekuenton.
Vetë bashkia e Vau Dejës ka zgjedhur të heshtë për fatin e kësaj qendre, që ishte një pikë takimi për artistët e zonës dhe komunitetin./ Oranews
