Një ngjarje trishtuese ka ndodhur në ndeshjen e Grupit B në Kampionatin Evropian, mes Danimarkës dhe Finlandës.
Nga fundi i pjesës së parë Christian Eriksen ka humbur ndjenjat në fushë, por i shpejtë ka qenë reagimi i kapitenit danez, Simon Kjaer.
Kapiteni Kjaer me të parë shembjen e Eriksenit në fushë nxitoi ta kthejë në krahë, në mënyrë që lojtari të mos gëlltisë gjuhën.
Me këtë gjest, kapiteni kreu “detyrën” e tij si lider i skuadrës edhe jashtë kontureve të lojës.
E reagimet në rrjete sociale nga e gjithë bota kanë lavdëruar veprimin e kapitenit.
Eriksen ishte duke ecur teksa u rrëzua në fushë, dyshimet e para janë se mund të ketë pësuar sulm në zemër. Menjëherë ka reaguar stafi mjekësor i Danimarkës duke i dhënë ndihmën “ringjallje kardiopulmonare”.
Gjendja shëndetësore e mesfushorit ofenziv të kombëtares së Danimarkës tashmë është e qëndrueshme, ka bërë të ditur UEFA.
Ndeshja fillimisht u ndërpre për më se 10 minuta dhe më pas u pezullua krejtësisht, teksa u vendos që të riluhet.
