Autoritetet turke kanë bastisur banesën ku jetonte pronari i kripotmonedhës turke, Faruk Fatih Ozer, për të cilin thuhet se fshihet në Shqipëri, pas arratisjes nga Turqia në muajin prill.
Policia ka ushtruar kontroll të imtësishëm në banesën e Ozer, por sipas autoriteteve, nuk është gjetur asgjë me vlerë që mund të ndihmonte hetimet.
Autoritetet turke, sipas mediave vendase, po punojnë për konfiskimin e çdo pasurie që Ozer ka në Turqi, deri në kapjen e tij dhe sqarimin e rrethanave për të cilat akuzohet.
27-vjeçari Ozer është person i shpallur në kërkim ndërkombëtar nga autoritetet policore turke dhe nga Sekretariati i Përgjithshëm i Interpolit në Lyon, pasi rezulton i dyshuar për mashtrim në shtetin turk nëpërmjet valutës elektronike bitcoin që kap vlerën rreth 2 miliardë dollarë.
Nga raportimet e bëra më herët, rezultonte se Faruk Ozer të jetë futur në Shqipëri nga pika e kalimit kufitar të Rinasit më 20 prill të këtij viti, ndërkohë që kanë dalë dhe pamje filmike nga momenti kur ai është akomoduar në një prej hoteleve të kryeqytetit, nga një shtetas shqiptar, i cili ka deklaruar se nuk ishte në dijeni të veprës penale që kishte kryer biznesmeni turk.
Ozer ka mohuar akuzat, ndërsa sqaronte në rrjetet sociale se kompania ishte në shënjestër të një fushate shpifjesh.
Sipas tij, kompania pezulloi përkohësisht aktivitetin, pasi llogaritë treguan një aktivitet të pazakontë për shkak të një sulmi kibernetik.
