Vrasja e 20-vjeçares britanike në Greqi nga 3 grabitës më 11 Maj ka bërë bujë dhe ka tronditur opinionin publik. 20-vjeçarja Karolina u mbyt për vdekje nga grabitësit pranë foshnjes së saj 11-muajshe, ndërsa bashkëshorti i saj ishte lidhur.
Ky i fundit, një pilot 32-vjeçar, ka treguar të gjithë dinamikën e krimit. Mediat greke kanë zbardhur deklaratën e tij, duke cituar “duhet të kemi fjetur rreth orës 01:15-01:30. U zgjova kur dëgjova kërcitjen e dorezës së derës. Nuk e kuptova sa ishte ora. Kur hapa sytë pashë 3 burra që hynë në dhomë. Njëri m’u afrua me pistoletë dhe para se të më thoshte diçka, i thashë që në dhomën e ndenjies ka 10 mijë Euro cash. Ju lutem mos na shqetësoni”.
Më pas, ai tregon se grabitësi tundi Karolinën që të zgjohej. Kjo e fundit filloi të bërtiste. Autori i dytë i drejtoi armën 20-vjeçares:
“Një burrë i shkurtër shkoi te gruaja ime, e ktheu me fytyrë poshtë nga jastëku. Sapo tentova të reagoja, ai më vendosi pistoletën nga ana e djathtë e qafës, pastaj më hodhi në dysheme”.
32-vjeçari tregon se e pa njërin prej autorëve të krimit. Ai kujton se grabitësit flisnin greqisht shumë mirë, por në një moment dëgjoi që flisnin gjuhë tjetër, që ngjasonte me gjuhën bullgare apo shqipen:
“Njëri kishte buzë të trasha, hundë të mprejtë, fytyrë të rrumbullakët dhe me mjekër, sy të shndritshëm. Kuptova që ishte mbi 35 vjeç, rreth 1.70 metra i gjatë”.
32-vjeçari kujton edhe momentin kur kuptoi që bashkëshortja e tij Karolina kishte vdekur:
“Për shkak se më lidhën sytë e humba vetëdijen për një moment. Kur u zgjova nuk dëgjova asgjë. Nuk e dija sa kohë kishte kaluar. Kur u zgjova pashë gruan time në shtrat pa lëvizur.
Duart i kishte të lidhura pas shpinës me disa rroba, ndërsa vajza jonë qëndronte zgjuar pranë saj, por nuk po qante. Përqafova gruan dhe vajzën duke qarë.
Pastaj një polic më tha se ajo është larguar, përpiqu të qetësohesh. Do të thotë që kishte vdekur. U shokova, përqafova vajzën dhe zbrita poshtë”.
Policia greke ka krijuar tashmë një identikit të personit që ka përshkruar 32-vjeçari. Hetuesit besojnë se është një shqiptar që drejton këtë bandë grabitësish të rrezikshëm.
