Refuzohet për herë të katërt ndryshimi i masës se sigurisë për ish gjyqtaren e Krujës, Enkeleda Hoxha, e cila u arrestua muajin e kaluar.
Vendimi për mosndryshimin e masës u bë nga Gjykata e Posaçme e Apelit, këtë të mërkurë, pavarësisht kërkesës së gjyqtares për tu liruar, për shkak se ka një fëmijë të mitur, dhe një djalë autik që kërkon kujdesin e saj.
Dy javë më parë, përveç masës së arrestit me burg, Enkelejda Hoxha u shkarkua dhe nga KLGJ, për shkak se dyshohet se ka liruar disa personazhe të njohur të botës së krimit, në shkelje me procedurat ligjore. Vetë Hoxha i ka mohuar vazhdimisht akuzat, ndërsa familja e saj pretendon që ajo ka qenë e ndikuar nga persona të tretë në dhënien e vendimeve.
Gjyqtarja Hoxha cilësohet si ‘avokatja mbrojtëse’ që ka mundësuar lirimin e parakohshëm të disa kriminelëve të dënuar me burgim të përjetshëm.
Kujtojmë se Gjykata e Posaçme e Shkallës së Parë Për Korrupsionin dhe Krimin e Organizuar ka caktuar më herët masën e sigurisë arrest në burg për shtetasen Enkelejda Hoxha, gjyqtare në Gjykatën e Rrethit Gjyqësor Krujë, e dyshuar për veprën penale “Korrupsioni pasiv i gjyqtarëve, prokurorëve dhe funksionarëve të tjerë të drejtësisë”, kryer në bashkëpunim.
Hoxha ka liruar nga burgu Endrit Doklen, Hekuran Billon, Genc Tafilin dhe Ilir Pajën, përmes një skeme të njëjtë.
