Nga Boldnews.al
Nëse i hiqet interneti ai vdes politikisht, nëse nuk funksionojnë edhe kamera dhe aparatë fotografik, atëherë duhet “varrosur”, sepse nuk ka më jetë politike dhe nuk ekziston as si fenomen. Kjo është mënyra e punës së kryeministrit Edi Rama i cili qeveris vetëm me një telefon në duar.
Prej më shumë se tre vitesh ai ka braktisur edhe punën për të cilën thotë se e ushtron. Mbi 80 % të vendimeve të Këshillit të Ministrave janë marrë në mungesë të tij, por ia ka lënë atributet e kryeministrit Erion Braçes, që e ka poshtë vetes, si në funksion zyrtar ashtu edhe në përditshmëri.
“KRYEMINISTRI EDI RAMA/ Në mungesë dhe me porosi ZËVENDËSKRYEMINISTRI ERION BRAÇE”. Kështu janë vendimet e Këshillit të Ministrave, ato vendime të cilat prekin jetën e çdo qytetari. Kemi një kryeministër i cili thjesht nuk bën punën e tij, atë për të cilën thotë se është votuar…
Kushdo që mund të dyshojë për këtë situatë mjafton që të futet në faqen zyrtare “kryeministria.al” për të kuptuar se firmën dhe vulën e mban në “xhep” Erion Braçe, të cilit i ka rënë “barra e madhe” mbi supet e vogla që të kthejë në vendime sms-të e Ramës, për tu dhënë pak erë shtet.
Formalisht e kemi kryeministër Ramën, praktikisht mbetet një “kryeministër imagjinar”, që prej më shumë se tre vitesh e gjysëm shumë rrallë ka shkuar në zyrë dhe mbajtur mbledhje me kabinetin e tij. Nuk po shëtit botën për të sjellë “paqe”, por gjezdis në Shqipëri duke bërë propagandë dhe u mburrur me veten se është kryeministri i vetëm në historinë e Shqipërisë që ka shëtitur kaq shumë vendin dhe takuar njerëz. Edhe kjo pjesë mbetet një mision mirëfilltas propagandistik, pasi e ka kuptuar se për të pasur jetëgjatësi në politikë nuk duhet të qeverisë, por të bëjë sikur qeveris.
Është e kotë t’i kërkosh njohuri mbi ekonominë, arsimin, apo shëndetësinë, sepse është shkëputur nga “librat e thellë” që në 8-vjeçare dhe pjesa tjetër e arsimit janë zhgaravina me emrrin pikturë, por të jetë i pranishëm në mbledhjet e kabinetit kjo është më e pakëta që duhet kërkuar.
Nuk kemi një “kryeministër dy metra”-sikurse e thotë me mburrje vetë Rama, por praktikisht kemi një kryeministër 1.58 cm, zotin Braçe…
Megjithatë kjo formë i ka ecur. Të mbash pas vetes zyrtarë të mbytur në korrupsion për Ramën doli sukses, pasi ta heqin shpesh lakun nga fyti në peridhë zgjedhore. Një pjesë të pasurisë së vënë mbi abuzim dhe korrupsion e “shkrijnë” në të mirë të Rilindjes dhe të individit që drejton gjithçka. Po ashtu shëtitja nëpër Shqipëri i jep mundësi për tu njohur edhe më mirë me atë botë të errët të krimit i cili shfaqet hazërxhevap sa herë bie tringëllima e ditës së zgjedhjeve. Sa për të qeverisur, kemi të madhin Braçe, i cili tashmë prej më shumë se tre vitesh e ka bërë “stazhin e kryeministrit”.
