Ministrja e Mbrojtjes, Mimi Kodheli ka reaguar për herë të parë pas sulmit të mediave greke ndaj saj, të cilat shkruajtën se 25 vite më parë ajo ka punuar si balerinë në klube nate në vendin fqinj.
Kodheli si përgjigjet për lajthitjen e mediave në Greqi, ka përdorur një thënie të ish-Kryeministres së Britanisë së Madhe, Margaret Theçer.
“Gjithnjë festoj pa masë nëse një sulm është praktikisht lëndues sepse mendoj…, mirë, nëse ata sulmojnë dikë personalisht do të thotë se nuk u ka mbetur asnjë argument politik”, thuhet në foton e publikuar nga Kodheli.
Faqja “militaire.gr” shkruante se Kodheli “para 25 vitesh, ishte një balerinë e bukur që punonte në Syngrou Avenue.
“Më pas ajo shkoi për studime në SHBA ku kreu doktoratë për Marrëdhënie Ndërkombëtare. Pasi u angazhua në politikë, sot ajo është ministre e Mbrojtjes në shtetin fqinj”.
Një shkrim i tillë në mediat greke erdhi pas përplasjes në distancë të dy ministrave të Mbrojtjes të Greqisë dhe Shqipërisë, ku Kodheli në reagimin e saj tha se ka ikur koha “satrapëve” si përgjigje ndaj kërcënimit të homologut grek.
