Komisioni Hetimor për “çështjen CEZ”, ka rinisur punimet ditën e sotme me debateve të ashpra mes përfaqësuesve të mazhorancës dhe atyre të opozitës. PD kërkoi dorëheqjen e deputetit Taulant Balla nga drejtimi i Komisionit hetimor të CEZ, por kërkesa u rrëzua me 5 vota pro.
Por në këtë komision nuk ishte i pranishëm ish-kryeministri Berisha që refuzoi të merrte pjesë në seancën e radhës. Ai injoroi kërcënimet e kryetarit të komisionit, deputetit socialist Taulant Balla se do ta sillte me forcë të dëshmonte.
Deputeti Arben Ristani sqaroi se Berisha nuk mund të merrte pjesë në komision për aq kohë sa Taulant Balla është në konflikt interesi. Balla është dënuar për shpifje me vendim të formës së prerë të Gjykatës së Apelit në Tiranë, pasi u padit nga djali i ish –kryeministrit Berisha. Me këtë argument Berisha u largua herën e fundit nga komisioni. Taulant Balla deklaroi se nuk ishte dënuar me vendim të formës së prerë, por zyra e shtypit e Berishës publikoi vendimin që përgënjeshtronte kryetarin e komisionit.
I injoruar nga Berisha, Balla deklaroi publikisht se do ta sillte Berishën me forcë. Por siç u pa sot, ai nuk e ka mbajtur fjalën. Madje ai as e përmendi më përdorimin e forcës dhe foli me tone të zbutura, duke u përpjekur të gjejë argumenta se ai nuk është në konflikt interesi.
