Kandidati për kryetar i Partisë Demokratike, Agron Shehaj siç edhe paralajmëroi ka dalë në një komunikim për mediat.
“Po kandidoj sepse udhëheqja aktuale po përpiqet ta kalojë humbjen e 25 prillit si një gjë të zakonshme. Kandidimi im është fillimi i një projekti për ndryshimin e PD”, tha Shehaj.
Shehaj tha se nuk do të ketë bashkëqeverisje me PS-në, në rast se ai zgjidhet në krye të PD-së, ndërsa ka shmangur komentet lidhur me shpalljen e ish-Kryeministrit Sali Berisha dhe familjarëve të afërt të tij si persona “non grata” nga Departamenti amerikan i Shtetit.
“Të gjithë i njohim kontributet e liderit historik të PD, por mendoj se kjo është një çështje delikate, për të cilën nuk dua të bëj komente”, tha Shehaj, duke iu shmangur një përgjigjeje nëse ai do të përjashtonte Berishën nga PD apo jo.
Shehaj tha se është i bindur që Lulzim Basha nuk e çon dot në fitore Partinë Demokratike.
“Unë jam i bindur, në këtë mënyrë nuk fitojmë dot, duhet të ndryshojmë lidershipin e PD”, tha Shehaj. Sipas tij, PD duhet të hapet për cilindo dhe janë demokratët që vendosin se kush ecën përpara dhe kush jo.
“Për të fituar zgjedhjet duhet hapur PD, ndaj të vjetërve dhe të rinjve. PD duhet të jetë transparente në vendimet që merr. Anëtarësia duhet të vendosë përmes votës qoftë edhe për listën e kandidatëve”, tha Shehaj.
Sipas tij, gara në PD nuk është e barabartë, ndërsa u shpreh se do të vijojë të jetë pjesë e grupit parlamentar të PD, nëse nuk fiton garën.
“Lulzim Basha humbi zgjedhjet dhe nuk mund të vazhdohet kvshtu. Ne nuk humbëm zgjedhjet ne lamë në pushtet qeverinë më të korruptuar të 30 viteve”, tha Shehaj.
