Presidenti Ilir Meta ka reaguar për herë të parë lidhur me shpalljen “non grata” në SHBA të ish-kryeministrit Sali Berisha.
Meta e cilëson vendimin e njoftuar Sekretari amerikan i Shtetit Antony J. Blinken – “’fletërrufe’ e porositur nga regjimi i kleptokracisë në Tiranë, kundër z.Sali Berisha, Presidentit të parë demokratik të vendit”.
Sipas Metës, kjo “fletërrufe” jo rastësisht u kërkua në këtë moment, kur procesi zgjedhor ende nuk është mbyllur zyrtarisht dhe kur institucionet, sipas Kodit Zgjedhor, duhet të shprehen lidhur me ankesat e shumta për manipulimet dhe krimet zgjedhore të denoncuara gjerësisht, që kanë cenuar rëndë standardet perëndimore të një procesi elektoral plotësisht të lirë, të ndershëm dhe demokratik.
Më tej në reagim, kreu i shtetit shprehet:
Duke u bërë thirrje të gjithëve të zbatojnë me rigorozitet ligjin, si dhe të gjitha kërkesat e Kodit Zgjedhor lidhur me procesin e 25 prillit, pasi kjo është dhe mbetet çështja më e rëndësishme aktualisht, ndjej përgjegjësinë të ndaj me secilin prej jush, mesazhin e solidaritetit, që i kam dërguar z.Sali Berisha dhe familjes së Tij ditën e enjte paradite, pas informacioneve, që mora nga burime të ndryshme dhe të besueshme:
“Përshëndetjet e mia më të sinqerta dhe solidaritet për Ju, Lilin dhe Familjen tuaj pas këtij akti të shëmtuar, të pabesë dhe të poshtër, që ka të bëjë vetëm me lobingjet antishqiptare dhe asgjë tjetër. Ata që financuan për të shpallur hero të Reformës në Drejtësi Dvoranin e Partisë mund të bënin çdo marrëzi dhe nuk mund të na habisin më me pacipësinë e tyre për respektin ndaj shtetit të së drejtës dhe pavarësinë e Drejtësisë.
Të fala!”
“Non grata”
Pak ditë më parë, në një deklaratë publike, Sekretari amerikan i shtetit Antony J. Blinken shpalli “non grata” në SHBA ish-kryeministrin dhe familjen e tij, duke e akuzuar Berishën për “përfshirje në korrupsion domethënës”.
“…Në cilësinë e tij zyrtare, veçanërisht si Kryeministër i Shqipërisë, Berisha ishte i përfshirë në veprime korruptive, të tilla si shpërdorim i fondeve publike dhe ndërhyrje në proceset publike, përfshirë përdorimin e pushtetit për përfitime personale dhe për të pasuruar aleatët e tij politikë dhe anëtarët e familjes së tij në kurriz të besimit të publikut shqiptar në institucionet e tyre qeveritare dhe zyrtarët publikë. Për më tepër, retorika e tij tregon se ai është i gatshëm të mbrojë veten, anëtarët e familjes së tij dhe aleatët e tij politikë në kurriz të hetimeve të pavarura, përpjekjeve kundër korrupsionit dhe masave të llogaridhënies…”, shkruhej në deklaratë.
Padia
Një ditë pas njoftimit të vendimit, ish-kryeministri Sali Berisha doli në një deklaratë për mediat ku njoftoi se do të ngrinte padi ndaj Blinken në një gjykatë të Francës.
Berisha arsyetoi se do e ngrejë padinë për “çështje dinjiteti”.
Ish-kryeministri mohoi kategorikisht çdo akuzë dhe apeloi që të zbardhen provat që kanë çuar në vendimin e shpalljes “non grata” të tij dhe familjes së tij.
