Pas deklaratës së kreut të Partisë Demokratike, Lulzim Basha, i cili nga Gjermania tha se Rama gënjeu, sepse nuk do të pranojë për përgjegjësinë që ka, përsa i përket përkthimit të ligjit të Vettingut, ka reaguar edhe kryeministri Edi Rama.
Rama në një postim në rrjetin social “Facebook”, ironizon Bashën duke thënë se ai është i vetmi perkthyes besnik i te vertetave te ketij vendi.
“Gënjej unë, gënjen BE, gënjejnë SHBA, gënjejnë të gjithë veç Lulit e PD, që janë i vetmi përkthyes besnik i të vërtetave të këtij vendi”, shkruajti Rama.
Një ditë më parë, Partia Demokratike deklaroi se Ligji i Vettingut është përkthyer qëllimisht me gabime për të manipuluar opinionin e Komisionit të Venecias dhe për autorësinë e variantit me gabime, opozita e drejton gishtin nga EURALIUS, referuar informacioneve që ajo thotë se ka marrë nga Gjykata Kushtetuese.
