Migen Memelli ka bërë një punë të shkëlqyer me Skënderbeun. 41-vjeçari e mori skuadrën korçare në vendin e parafundit, ndërsa tani me ndeshjet e bëra dhe pikët e marra, Skënderbeu renditet në vendin e 7-të dhe është pothuajse e shpëtuar.
Në një prononcim për “Sport Magazine”, Memelli ka treguar sekretin e këtij suksesi, ndërsa ka folur edhe për të ardhmen e tij.
“Ne donim të provonim shanset tona dhe të mos dorëzoheshim. Kishim individ me cilësi të mëdha. Që ditën e parë që u nisa nga Tirana, të gjithë më thonin pse po shkon. E falënderoj presidentin e klubit që më dha besim. Se nëse nuk na japin besim ne si trajner, nuk mund të shpalosim vlerat tona. Por sigurisht që falë lojtarëve kemi arritur këto rezultate. E ardhmja? Dëshira ime është që të vazhdoj kështu, po presidentëve nuk i dihet se ndonjëherë të shtrëngojnë duart. Sulmuesit i mbajmë përpara porte në stërvitje, punojmë edhe me mbrojtjen dhe gjithë skuadrën në tërësi”, u shpreh Memelli.
