Një person është plagosur me armë zjarri nga efektivë të policisë këtë të Hënë në Fier. Burime zyrtare bëjnë me dije se, policia po ushtronte një kontroll për kabanis në fshatin Gjorgoz, kur është ndeshur me një person që u ka drejtuar një armë zjarri. Në këto kushte, nga efektivët është qëlluar me armë.
I plagosuri është Greseld Shpataraku, 29-vjeç nga Patosi.
Ngjarja
Policia njoftoi se: në zbatim të planit të masave për kontrollin e territorit me qëllim parandalimin e kultivimit të bimëve narkotike, grupi i kontrollit të territorit i përbërë nga punonjës të Policisë të Komisariatit të Policisë Fier, gjatë kontrollit të territorit në një zonë të pyllëzuar të fshatit Gjorgoz të Njësisë Administrative Cakran të bashkisë Fier, ka konstatuar një person që mbante në dorë një armë zjarri kallashnikov.
Punonjësit e Policisë i kanë bërë thirrje personit që të hidhte armën dhe mos të lëvizte, por ai nuk i është bindur urdhrit të Policisë dhe ka drejtuar armën e zjarrit nga punonjësit e Policisë, duke e mbushur atë me qëllim që të qëllonte në drejtim të tyre.
Shërbimet e Policisë kanë ndërhyrë për ta neutralizuar dhe për pasojë i riu ka mbetur i plagosur.
29-vjeçari aktualisht ndodhet në reanimacionin e spitalit të Fierit nën kujdesin e mjekëve.
Hashashi
Nga kqyrja e vendit të ngjarjes rezultoi se në afërsi të vendit ku u konstatua i riu me armë kishte dhe fidanë kanabis sativa të kultivuar në kubikë.
Në cilësinë e provës materiale është sekuestruar edhe arma e zjarrit kallashnikov.
Në drejtim të vendngjarjes ka shkuar grupi hetimor, i cili në bashkëpunim edhe me SHÇBA, nën drejtimin e Prokurorisë, vijon punën për zbardhjen e plotë të rrethanave të ngjarjes, njoftoi policia.
Dyshohet se personi i armatosur ishte ngarkuar për ruajtjen e kanabisit, bënë me dije burime policore.
