Nga BoldNews.al
Një nga biznesmenët që vepron prej vitesh në Golem ka fituar edhe ankandin e hapur nga Redjan Krajli, kryetari i Bashkisë së Kavajës.
Para pak javësh, BoldNews raportoi se cili “oligark” ia kishte vënë syrin një sipërfaqe prej 15 400 metër katrorë në Qerret të Kavajës me një afat prej 20 vitesh. Madje, me çmimin qesharak për vetëm 270 mijë lekë për 1 hektarë në vit. Në ankand ka marrë pjesë vetëm një ofertues, pikërisht “Bonita”, me pronar Astrit Ismailin. Ai ka ofruar 20 mijë lekë më shumë sesa vlera fillestare e ankandit, pra me 290 mijë lekë për 1 hektarë në vit.
BoldNews ndoqi në vijimësi këtë procedurë ankandi të hapur nga kryetari i pazgjedhur i Bashkisë së Kavajës. Ashtu si edhe krerët e bashkive të tjera, të cilët përfituan nga mosfutja e opozitës në zgjedhjet lokale të 2019-ën, edhe Krajli po ia sheh hajrin pikërisht kryetarllëkut.
Ai ka vepruar me shpejtësi për të bërë dhjetëra tendera, duke përfituar edhe nga rindërtimi, apo edhe nga pozicioni gjeografik i Kavajës, e cila ka një vijë të konsiderueshme të bregdetit, duke filluar nga Golemi e duke përfunduar në Spille.
Sipas dokumenteve, para pak javësh u hap ankandi me objekt “për dhënien me qira të pasurisë nr. 57/2 vol. 8 faqe 97 në Z.K. 3101 Qerret, e llojit ‘pa frut’, me sipërfaqe 15400 m2”. çmimi ishte vetëm 270.000 lekë/ha në një vit kalendarik. Kohëzgjatja e kontratës plot 20 vjet, nga data e nënshkrimit të kontratës.
“Kriteret e përzgjedhjes së fituesit çmimi i ofertës ekonomikisht më i favorshëm, ndikimi pozitiv në ushtrimin e një veprimtarie e cila do të gjenerojë të ardhura dhe do të nxisë punësimin” thuhej në dokumente.
Më tej, sqarohej se në këtë procedurë ka qenë pjesëmarrës një ofertues, pikërisht subjekti “BONITA”, me një vlerë 290.000 lekë, duke u shpallur edhe fituese.
Para pak javësh, BoldNews publikoi një investigim me titull “Cili oligark ia ka vënë syrin plazhit në Qerret? 15400 m2 nxirren me qira për 20 vjet me çmimin qesharak 270.000 lekë në vit!”
Duke analizuar dokumentet, në denoncuam se një nga zonat më të preferuara të oligarkëve është padyshim zona e Qerretit në Kavajë. Afërsia me Tiranën dhe Durrësin, e kanë shndërruar këtë plazh si mjaft komod, nisur edhe nga disa fshatra me vila luksoze që ndodhen atje.
Denoncimet e vazhdueshme të mediave flasin se oligarkët, me të gjitha pushtetet, kanë zaptuar çdo pronë publike, duke ngritur komplekse, pallate e madje edhe fshatra. Dhe, ashtu siç pritej, ankandin e fitoi një biznesmen i fuqishëm i zonës, i cili ka përfituar edhe nga tërmeti, duke lidhur kontratë me qeverinë për strehimin e familjeve që iu shkatërrua shtëpia.
