Drejtori i Institutit EPIK në Kosovë, Demush Shasha thotë se Bashkimi Europian është duke përgatitur një “non-paper” tjetër për ndryshimin e kufive të Ballkanit.
Përmes një postimi në Facebook, Shasha thotë se një “non-paper” që sipas tij, tradicionalisht Shërbimi i Jashtëm i BE-së nuk harton dokumente të tilla pa u konsultuar me të gjitha shtetet. Sipas tij, BE-ja do t’i ofrojë të gjithë shteteve të përfshira në “non-paper” ato çfarë ato kërkojnë.
Postimi i plotë:
Ky është tani një “non-paper” me autor – dhe shumë të rëndësishëm. Tradicionalisht Shërbimi i Jashtëm i BE-së nuk harton dokumentet e këtilla, qoftë edhe “non-paper”, pa një konsultim paraprak me shtetet anëtare dhe institucionet e BE-së. Rrjedhimisht, mund të konkludohet me siguri të madhe se ekziston një disponim i favorshëm brenda BE-së për idetë e diskutuara.
Ndoshta pjesa më e rëndësishme e dokumentit është vetnjohja nga BE-ja se status-quoja në rajon është paqëndrueshme dhe të gjitha vendet e Ballkanit presin lidership të vendosur nga ana e BE-së. Kjo, në afatshkurtër, nënkupton minimalisht vendimet në vijim:
– Kosovë: liberalizim i vizave dhe statusi i vendit kandidat;
– Bosnje: statusi i vendit kandidat;
– Maqedoni dhe Shqipëri: nisja e negociatave;
– Mali i Zi dhe Serbi: datë jozyrtare për anëtarësim në BE apo një zgjidhje kreative diplomatike që do avanconte marrëdhëniet e tyre me BE-në.
Ndërkohë, vendet e Ballkanit e kanë përgjegjësinë e vet që të përfundojnë detyrat e shtëpisë. Se në afat-shkurtër BE-ja do gjej kapacitetet për vendimet e lartcekura nuk kam dyshim, por pyetja që patjetër do lind është se a do pranohen këto 6 shtetet ndaras në BE, apo sëbashku? Dhe në fakt kjo është pyetja për të cilën idealisht, së shpejti, BE-ja do përgatit një “non-paper” të radhës.
