Finalja e Champions League, programuar të luhet më 29 maj në Stamboll, po kthehet në një telenovelë. Turqia është në listën e kuqe të Britanisë së Madhe, që i ndalon fluturimet drejt këtij shteti për shkak të rasteve të shumta me COVID-19.
Mitiku “Wembley” kohët e fundit është raportuar si opsioni më i realizueshëm, duke qenë se në finale janë dy klube angleze, Manchester City dhe Chelsea. Gjithsesi The Times raporton se UEFA dhe qeveria britanike nuk e kanë gjetur gjuhën e përbashkët.
Janë disa çështje që i mbajnë palët larg dhe tani në skenë ka dalë një opsion tjetër. Porto ka ofruar stadiumin e tij, “Dragao”, për finalen dhe Portugalia nuk ka kufizime për vizitorët në vend, si dhe është në “listën e gjelbër” të Britanisë së Madhe dhe nuk ka pengesa për fluturimet drejt vendit iberik.
