Të tjera detaje raportohen nga ngjarja tragjike që i ndodhi 3 pjesëtarëve të një familjeje nga Gjilani, që humbën jetën brenda 24 orësh, ndërsa ishin me pushime në Shqipëri.
Nga raportimet mësohet se viktimat dyshohet se janë helmuar nga ushqimi, më saktësisht nga kërpudhat që ata i kishin marrë në zonën e Gjirit të Lalëzit në Shqipëri.
Burimet bëjnë të ditur se rasti tragjik i vdekjes së tre anëtarëve ka ndodhur në fillim të kësaj jave.
Vdekjen e tre anëtarëve të kësaj familje e ka konfirmuar edhe kryetari i Komunës së Gjilanit, Lutfi Haziri i cili ka kërkuar nga autoritetet në Shqipëri zbardhjen sa më të shpejt të këtij rasti.
“E nderuar familje Haliti, Me trishtim e mora lajmin për ndarjen nga jeta në mënyrë tragjike të tre anëtarëve të familjes suaj, në Shqipëri, Elfete, Afrim e Ferzinaze Haliti.Kjo tragjedi na ka tronditur të gjithëve dhe apeli im është që të ndriçohet rasti sa më parë nga autoritetet e Republikës së Shqipërisë. Familje e dashur Haliti, ju lus që të bëheni të fortë për ta përballuar këtë tragjedi që na tronditi të gjithë. Zoti ua lehtësoftë dhembjen!”, thuhet në telegram.
