Nard Ndoka, i cili nuk arriti të merrte mandatin e deputetit në Qarkun e Shkodrës, ku ishte pjesë e listës shumëemërore të koalicionit PD-AN ka vijuar me kritikat dhe akuzat ndaj kreut demokrat, Lulzim Basha.
Duket se Ndokës nuk i del inati që emri i tij renditej në një zonë aspak të sigurtë për marrjen e mandatit të deputetit, ndërsa kolegë të tij të partive aleate, do të jenë pjesë e Parlamentit të ri, për shkak të renditjes në atë që mund të quhet si lista preferenciale.
Ish-deputeti nënvizoi se Basha duhet të heqë dorë nga interesat e ngushta brenda PD-së dhe të hapë partinë në mënyrë që të zhvillohen zgjedhje transparente.
“Basha duhet të heqi dorë nga interesat e ngusta të partisë së tij, duhet të heqi dorë nga komisionerët partiakë. Nuk nuk e shoh PD në funksionin e një lideri, e shoh më gjerë.
Ne kemi bërë sakrificë që Basha të rritej, heqja e mandateve, mos futja në zgjedhjet lokale. Votat e mia janë vjedhur nga PD, si gjithmonë që votat e partive të vogla kalojnë në partitë e mëdha.
Basha zhvilloi fushatë individuale dhe gaboi me aleatët, i përjashtoi nga fushata. Ai erdhi disa herë në Shkodër dhe mua s’më takoi, shkoi disa herë në Durrës dhe nuk e takoi Agron Dukën. Shtatori-tetori do jetë vendimtar si për z.Basha dhe për të tjerët, për mua apo dhe vetë PD-në. Unë duhet thënë që u dëmtova nga mos-respektimi i marrëveshjes me Bashën”, tha Ndoka.
